“Fitore e rëndësishme, përballë një rivali historik. Për atë çka skuadra dha në fushën e lojës, më të rëndësishëm janë ata që janë në stol sesa ata që e filluan nga fillimi. Fituam një ndeshje të dominuar”. Orges Shehi nuk e fsheh kënaqësinë për fitoren në ndërqytetase dhe kundër ish-skuadrës së tij. Dy gola të Maguette i dhanë fitoren Partizanit, 1-2 ndaj Tiranës, por mendimi i teknikut shkon për presidentin Demi. “Fitorja është për të gjithë tifozët, në veçanti për presidentin tonë. Këtë fitore ia dedikoj atij dhe babait të tij që po kalon një gjendje kritike në rrezik për jetën”.
Elozhet e teknikut Shehi për Maguette, autori i dy golave në deri nuk mund të mungonte. Mesfushori është tashmë në kuotën 5 në këtë sezon: “Maguette është lojtari i jonë më i rëndësishëm. Ofertat janë të pranishme. Ka kontratë me ne, futbolli ka një dinamikë të madhe, klubi do të vlerësojë situatat dhe kushtet dhe pastaj do të vendosi. Nuk prishim çdo gjë, për të transferuar lojtarët. Është i përqendruar te ne, të gjithë lojtarët kanë oferta, do t’i vlerësojmë, pa prishur grupin”, tha Shehi.
Në fund edhe paralajmërimi për Vllazninë: “Ne kërkojmë të përmirësohemi dhe të ngjitemi sa më shumë. Bravo i qoftë kundërshtarit në qoftë se i fiton të 3 ndeshjet, në të kundër ne do të bëjmë maksimumin për t’u ngjitur në klasifikim”, u shpreh Shehi.
FAGU: “12 PIKË, NUK KA RRUGË TJETËR”
“Në radhë të parë më vjen keq për humbjen sot, mendoj që kemi zhvilluar një ndeshje të mirë. Nyuk meritonim ta humbnim ndeshjen. Shpresoj shumë që në këto 3 ndeshje të japim këtë paraqitje për të arritur objektivin që kemi”. Erbim Fagu ka mbetur i dëshpëruar pas humbjes në shtesë me Partizanin. Tekniku i Tiranës megjithatë ka rezerva për arbitrin: “Mbas kartonit të kuq, na u prishën shumë ekuilibrat dhe ishim të pafat. Kishim plan B, por u kushtëzuam shumë nga kartonët e verdhë që na dha arbitri dhe ndryshuam disa herë zëvendësimet që kishim për të bërë. Në çdo faull që ne shkaktonim merrnim karton të verdhë. Kjo na kushtëzoi në zëvendësimet, u munduam të hiqnim lojtarët me të verdhë, për të mos e pësuar. Lodhja fizike e ditës së mërkurë na kushtëzoi shumë”.
Lexo më tej: Video/ Super Maguette fundos Tiranën në shtesë: dy kartonë të kuq e Fagu jashtë Europës
Fagu megjithatë nuk dorëzohet për arritjen në katërshe: “E mendojmë gjatë gjithë kohës, për të arritur në “Final 4” duhet të fitojmë 3 ndeshjet që na kanë mbetur, nuk ka rrugë tjetër. Unë kam shumë besim, në ndeshjet e fundit kemi luajtur shumë mirë, kemi krijuar raste, kemi qenë në stabilitet. Në 3 ndeshjet e fundit do të japim gjithçka për gjithçka, nuk kemi ccfarë të humbim”, u shpreh Erbim Fagu.