Tessa Hansen-Smith, një 25-vjeçare nga Fresno në Kaliforni të SHBA-ve është duke jetuar në një sprovë të përditshme që nga mosha 8 vjeç. Alergjike ndaj ujit, ajo nuk mund as të qajë apo të djersitet pasi menjëherë i krijohen mavijosje në lëkurë e cila më pas i rrjedh gjak. Ajo vuan nga urtikaria akuagjenike, një sëmundje e rrallë që prek rreth 250 njerëz në të gjithë botën dhe që e pengon madje edhe të pijë ujë.
Kjo e ka detyruar vajzën të hapte një GoFundMe për të mundur të paguante shpenzimet mjekësore. Tessa i tha televizionit amerikan Abc30 se ëndërron të bëhet infermiere. “Shpresoj të jem në gjendje të kthehem përsëri në shkollë, të jem në gjendje të punoj, të gjej një ndjenjë normaliteti në jetë” – tha ajo.
Po çfarë pi dhe si lahet Tessa? Në pamundësi për të pirë ujë ose për të ngrënë ndonjë gjë që përmban shumë ujë, përndryshe ndihet sikur po digjet ajo është e detyruar të pijë kryesisht qumësht, pjesa ujore e të cilit balancohet nga yndyrat dhe proteinat. Larja e saj është padyshim shumë e vështirë.
Ajo thotë se është e detyruar të bëjë dush herë pas here, pavarësisht se shmang çdo aktivitet që mund ta bëjë atë të djersitet ose të bëhet pis. Ajo që bën shpesh është të rruhet dhe të përdorë deodorant “kudo që është e mundur edhe pse kjo nuk e bën të ndihet mirë”.
Problemet e Tessa filluan kur ajo ishte vetëm 8 vjeç. “Unë dola nga dushi dhe kisha mavijosje të mëdha në lëkurë, skalpi i kokës më rridhte gjak”, – tha ajo. Nëna e saj Karen, mjeke familjeje ishte e para që kuptoi problemin e së bijës. Pasuan vite testesh dhe odiseje mes specialistëve. Nëna e saj thotë se “ndihet fajtore që nuk e kuptoi sëmundjen e saj shumë më herët”.
Shkaqet e kësaj patologjie e cila prek më shpesh femrat nuk dihen ende. Urtikaria akuagjenike është një formë e rrallë urtikarie e shkaktuar nga kontakti me ujin, e cila shkakton gërvishtje, kruajtje dhe skuqje të lëkurës. Simptomat shfaqen brenda pak minutash pas ekspozimit ndaj ujit dhe mund të zgjasin nga 30 minuta në më shumë se 1 orë.
Shkaku i saktë i kësaj gjendje nuk dihet, por mund të lidhet me çlirimin e histaminës ose ndërveprimin mes ujit dhe përbërësve të panjohur të lëkurës. Urtikaria akuagjenike prek më së shumti femrat e reja dhe nuk është një alergji e vërtetë, pasi nuk përfshin antitrupa IgE. Trajtimi bazohet në shmangien sa më të madhe të kontaktit me ujin dhe në përdorimin e antihistamines ose kortikosteroideve në rast krizash.
A mund të pijë ujë dikush që është alergjik ndaj tij? Dhe si mund ta kuptosh nëse je alergjik ndaj ujit? Quhet “alergji nga uji”, por njerëzit me urtikari akuagjenike mund të priren të pinë, sepse reaksioni alergjik ndodh vetëm pas kontaktit me lëkurën. Por në raste të rralla mund ta shmangni këtë për të parandaluar reaksionet e mundshme në mukozën e gojës. Për të kuptuar nëse jeni alergjik ndaj ujit apo nëse vuani nga urtikaria akuagjenike, duhet të konsultoheni me një alergolog. ©LAPSI.al