Batutat e Arian Çanit në emisionin e tij “Zonë e Lirë” jo pak herë i kanë kaluar kufijtë. Megjithatë, çdo gjë shkonte në rregull për sa kohë ato u adresoheshin personazheve që intervistonte moderatori. Problemet nisën në momentin kur personazh u bë një nga bashkëpunëtoret më të afërta të Çanit, asistentja e tij, Romina Alku.
Sophia bjonde u zëvendësua të premten e shkuar. Fakt ky që zgjoi jo pak kureshtjen e audiencës së këtij emisioni. Menjëherë vërshuan edhe thashethemet mbi motivet që e detyruan ish-velinën e Fiks Fare, të largohet. Në lidhje me këtë “surprizë” jo të këndshme, “Ledio të lutem”, regjisori i “Zonë e Lirë” rrëfen për “Vip Pages” se Sofia është larguar përfundimisht nga emisioni.
I pyetur mbi arsyet pse e detyruan bukuroshen e “Zonë e Lirë” drejt vendimit për të braktisur emisionin dhe nëse është e vërtetë që ajo u largua vetëm prej batutës së Çanit, Ledio shprehet: “Çani nuk është prononcuar për këtë çështje, kështu që as mua nuk më takon të prononcohem. Megjithatë, për sa kohë ai nuk ka folur, do të thotë që nuk i ka dhënë rëndësi kësaj gjëje”. Ledio Topalli i cili po ashtu siç edhe Romina, kanë disa vite si bashkëpunëtorë të Çanit, thotë: “Ka ikur ajo Sofi, është një Sofi tjetër. Ajo nuk e kishte emrin Sofi, është kjo, mund të vijë dikush tjetër nesër, apo dikush tjetër më vonë. Sofia nuk është tapi aty, por një karakter që për 5 vjet u luajt si rol nga ajo dhe tani po luhet nga një tjetër”.