Një fund ndeshje e tensionuar në Marassi. Sampdoria akuzon teknikun e Atalantës Gasperini se ka goditur me dorë sekretarin e përgjithshëm të dorianëve Massimo Ienca në tunelin që të con në dhomat e zhveshjes. Gasperini, që po protestonte ashpër për penalltinë e akorduar për Sampdoria, duke dalë nga fusha është kryqëzuar me drejtuesit e Sampdorias, e sipas akuzës e ka goditur duke e shtyrë. Ienca, duke u rrëzuar përtokë, ka pësuar një dëmtim në dorë.
“Ienca është një person që e njoh mirë, ka një të kaluar të gjatë tek Genoa. Njoh edhe disa pjesëtarë të familjes së tij. Më doli përballë e më pengonte kalimin dhe e spostova që të kaloja. Kjo është ajo që ndodhi, pjesa tjetër është një skenë teatrale e ai ndonjëherë është mësuar me këto gjëra”, ka treguar Gasperini versionin e tij të fakteve.
“Nuk ka asnjë skenë ose provokim. Ky nuk është sport – ka thënë zv. presidenti i Sampdorias, Romei – Ka dëshmitarë për këtë rast, më treguan për një goditje të fortë. Prokuroria Federale do të bëjë detyrën, por këto sjellje janë për tu censuruar”.