Eleminatoret po afrojnë. Pas zgjedhjes në krye të kombëtares kuqezi të Edy Reja, e gjithë vëmendja është përqendruar në debutimin e teknikut dhe në impaktin që do të ketë ish-Lazio në krye të Shqipërisë. Pritja do të marrë fund, pas 5 ditësh, kohë kur Reja do të nisë punën me lojtarët. Në agjendën e teknikut dhe Federatës Shqiptare të Futbollit, përpara grumbullimit në Gjermani për të përgatitur në mënyrën më të mirë transfertën me Islandën dhe sfidën në shtëpi me Moldavinë, është nisja e punës në Tropikal pikërisht në 20 Maj.
Natyrisht tekniku ka menduar këtë sistem pune, për të mbajtur skuadrën pranë tifozëve të tyre e për të qenë në kontakt me median, në mënyrë që të mos krijohet një distancë që në hapat e parë të rrugëtimit. Deri në 26 Maj grumbullimi do të bëhet me vetëm 9 lojtarë, që kanë përfunduar kampionatet e tyre, ndërsa të hënën tekniku do të ketë në dispozicion gati 85% të grupit, me të cilët do të punojë deri në 2 Qershor. Pikërisht atëherë skuadra do të udhëtojë në mëngjes drejt Frankfurt, për një grumbullim katër ditor deri më datë 6 Qershor, me ekipin të plotë tashmë. Mëngjesin e të enjtes kuqezinjtë do të nisen për në Rejkjavik ku do të zhvillojë dy séance stërvitore: ditën e mbërritjes, në 6 dhe në 7, ndërsa debutimi i Edy Reja në pankinë do të bëhet në 8 qershor kundër Islandës, në orën 3 me orën tone. Nuk ka kohë për të humbur dhe kjo është e kuptueshme, ashtu si kërkesa e teknikut për tu nisur menjëherë pas ndeshjes me charter për në Tiranë. Seanca e parë stërvitore në Tropikal është programuar në datën 9 qeshor në Tropikal, ku skuadra do të qendrojë deri përpara ndeshjes me Moldavinë, që do të luhet në Elbasan Arena.
Gjithcka e menduar dhe e programuar në bazë të impaktit që Edy Reja kërkon të japë tek lojtarët dhe tifozët e tij të rinj. Tekniku nuk kërkon ti lërë në dorë asgjë rastësisë dhe pikërisht në 3 Maj ka inspektuar ambjentet e Kompleksit Tropikal, përpara se të ndiqte dy ditë më pas në Athinë Ergys Kaçen dhe Mihajn në ndeshjen Panathinaikos- Panetolikos.