Një sezon si ai që sapo u mbyll, Tirana nuk ka ndërmend ta përjetojë më, ndaj ka nisur me shpejtësi punën për të ndërtuar skuadrën që të jetë e aftë të konkurojë për objektiva të rëndësishëm. E gjitha sigurisht që niste nga tekniku Ardian Mema, asnjëherë në dyshim, por asnjëherë i konfirmuar, deri të enjten, kur akordi mes palëve u bë zyrtar. Kjo ishte pritja e nevojshme për të nisur merkaton, me orientimet pikërisht të Memës mbi lojtarët për të cilët ka nevojë, duke nisur nga supermarketi Flamurtari, që me problemet që ka, i ka hapur oreksin jo vetëm bardhebluve.
Torassa e Kale janë sugjerimet e teknikut, që mendon Ngo’o në qendër të sulmit dhe në këtë mënyrë kompleton vijën e parë offensive. Për amerikano-latinët është pothuaj e mbyllur dhe mungon vetëm firma, ndërsa për mesfushën Idriz Batha është pika mbi të cilin do të ndërtohet reparti. Ish-lojtari i Partizanit është fare pranë akordit dhe në ditën e fundit palët janë afruar shumë mes kërkesës dhe ofertës aq sa trajneri Ardian Mema është i sigurtë se do ti ketë lojtarët së shpejti në dipozicion.
24 herë kampionët kanë insistuar edhe për Enea Kolicin, duke parë problemet e shfaqura nga Abibi sezonin e kaluar, por bisedimet kanë pësuar një frenim, me bardheblutë që kërkojnë të investojnë në një mbrojtës, duke parë si zgjidhje Ilion Likën.