Mbështetës të Partisë Demokratike kanë shpërndarë mëngjesin e sotëm në qytetin e Shkodrës, fletushka me mbishkrimin “Narko-Valdrini jashtë Bashkisë”.
Në njoftimin për shtyp të degës lokale të PD-së, shkruhet se qytetarët kanë nisur reagimin kundër kryebashkiakut të zgjedhur të Shkodrës, të dalë nga zgjedhjet vendore monopartiake të 30 qershorit, në vazhdën e akuzës së artikuluar prej disa javësh nga selia blu, se Pjetri ka qenë i ndaluar për trafikim të lëndëve narkotike dhe i dëbuar për këtë arsye nga Italia.
Në pankartat që janë vendosur pranë automjeteve të parkuara në rrugët kryesore të qytetit, është shkëputur moment i votimit të Pjetrit më 30 qershor, duke i bashkëngjitur logon e Partisë Socialiste me simbolin e kanabisit, si dhe hekurat e qelisë, fati i vërtetë që sipas opozitës, e pret “të zgjedhurin e Ramës”, kur të ketë një hetim për dënimin e tij në Itali.