Vlerat ndonjeherë nuk lidhen me statuset dhe kjo provohet më së miri tek Juventus. Në prag të Asamblesë së ortakëve, parashikuar në 24 tetor, klubi i Juventus ka publikuar një relacion mbi pagat e drejtuesve për sezonin 2018/19: drejtori sportiv Fabio Paratici është më i paguari me 2,04 milionë euro (mes pjesës fikse e bonusit), duke lënë pas edhe presidentin Andrea Agnelli, me 504.000 euro, e zëvendës presidentin Pavel Nedved, me 503.000 euro, në podiumin e pagave.
Në të dhënat, që bën të ditur Calcio & Finanza, shfaqen edhe pagat e anëtarëve të Këshillit të Administrimit (spikat Paolo Garimberti me dicka më pak se 74.000 euro) e të figurave që janë larguar nga Juventus tetorin e kaluar: Giuseppe Marotta (gati 1,5 milionë euro për periudhën korrik-tetor 2018) e Aldo Mazzia.