Woodward out! Kjo është fushata e re e nisur në rrjetet sociale nga tifozët e Manchester United, të tërbuar me zëvendëspresidentin e tyre ekzekutiv (përgjegjësi i operacioneve të merkatos) pasi e kanë parë, të paktën kështu pretendojnë mbështetësit e Djajve të Kuq, të grindet keq me legjendën e klubit Sir Alex Ferguson, trajneri që udhëhoqi United për cerek shekulli, duke fituar gjithcka.
Foto e debatit të pretenduar në tribunën e stadiumit të Southampton, ku United ka barazuar 3-3 me skuadrën vendase, është bërë virale. Në të duket Ferguson e Woodward, që bëjnë gjeste, por pa u kuptuar nëse vërtetë po grinden. Por për tifozët është kështu, e në rrjetet sociale tani të gjithë përmendin se “Ferguson nuk preket”, sipas asaj që shkruan ‘Daily Mail’. Ose se “rregulli numëri 1: mos zhgënje kurrë Sir Alex Ferguson”.
Tani priten zhvillime në këtë cështje e edhe mbetet për tu parë se cilat do të jenë lëvizjet e merkatos së United në janar, ndërsa pankina e Ole Gunnar Solskjaer është përsëri në rrezik. Megjithatë, sipas asaj që bëjnë të ditur mediat britanike, për Paul Pogba, gjithnjë në shënjestër të Real Madrid e Juventus, duket e përjashtuar mundësia për tu larguar para mbylljes së sezonit.