“Nesër duhet të japin 110% për të arritur objektivin tonë. Kundër Lituanisë kemi humbur dhe nuk duhet të lejojmë që ata të marrin epërsinë”. Fjalë kapiteni, fjalë të një eksperti, fjalë të thëna nga Etrit Berisha në konferencën për shtyp përpara ndeshjes me Lituaninë në Vilnus, e vlefshme për grupin C4 të Nations League. Portieri shtatlartë i bën llogaritë shpejt dhe e di që kjo është një ndeshje vendimtare, duke qenë se me dy fitore lituanezët do bëheshin të pakapshëm të paktën për kuqezinjtë: “Unë mendoj që Lituani luajti shumë mirë në ndeshjen e parë. Taktikisht kanë luajtur shumë mirë dhe na kanë vënë në vështirësi. Ndoshta edhe ne nuk e kemi bërë ndeshjen më të mirë që duhet të bënim. Por tani vlen ndeshja e nesërme, ku ne duhet të jemi jashtëzakonisht të përqëndruar dhe përgatitur. Do të jetë një ndeshje kyçe për rrugëtimin tonë”.
Të gjitha skuadrat janë me 4 pikë dhe kjo i jep shanse të gjithëve të qendrojnë në lojë, edhe Shqipërisë së të rinjve, që kanë patur një impakt pozitiv në skuadër edhe në këndvështrimin e kapitenit: “Në grup kemi lojtarë të rinj. Ka shumë prurje të reja për shkak edhe të mungesave. Djemtë e rinj kanë kualitete, por iu duhet kohë që të luajnë me Kombëtaren dhe të ambienton. Duhet të japim maksimumin e tyre. Ne më të vjetrit duhet t’i ndihmojmë me të gjitha mënyrat. Kur të arrihet vetëbesimi në skuadër, gjithë ekipi do të përfitojë”, përfundoi Berisha.