Pas anulimit të panairit të librit, kreu i shoqatës së Botuesve flet për variantin online

Panairi i librit është anuluar në formën e tij klasike si një pikëtakim mes lexuesve e autorëve. Një formë alternative pritet të vijë përmes takimeve letrare e shitjeve online.

Kreu i Shoqatës së Botuesve, Petrit Ymeri, ka sqaruar se Ministria e Shëndetësisë nuk dha leje për panairin, pavarësisht rimodelimeve që janë përpjekur të bëjnë organizatorët.

“Ne e rishikuam planin tonë të panairit, zvogëluam ditët nga 5 në katër, reduktuam oraret, zmadhuam në planimetri, sipërfaqet e përbashkëta për lexuesit, që janë korridoret, megjithatë, përgjigja erdhi negative. Ne e mirëkuptojmë, është normale, që kërkohet të mos bëhen grumbullime masive siç është Panairi, sepse paraqet rrezikshmëri të lartë”, tha Ymeri.

Në kushtet e pandemisë, vëmendja ndaj librit, do të tërhiqet ndryshe. Ymeri, kreu i shoqatës së Botuesve, tha se ‘panairi online’ që do të bëhet do të shtrihet në dy plane.

“Një do jetë nxitja e shitjeve online me platforma të ndryshme, ndërsa aktivitetet që ishin menduar do t’i bëjmë në pika të ndryshme të qytetit”, tha ai.

Petrit Ymeri prezantoi dje projektin evropian te letërsisë ku 10 autore si Milan Kundera, Alda Merini, apo Peter Handke, do te vijnë në shqip me përkthimet e Mirela Kumbaros, Ledia Dushit, apo Jonila Godoles. Një përgjigje erdhi edhe mbi Handken e shumëdebatuar ne shqip.