Bologna, përmes një komunikate zyrtare, i ka kërkuar falje tifozëve për videon e xhiruar dje brenda autobusit të ekipit, para ndeshjes kundër Beneventos, ku trajneri Sinisa Mihajlovic kishte komentuar me ironi disa nga mbështetësit e mbledhur para stadiumit për ti dhënë suportin skuadrës me koret dhe pankartat e tyre. “Shikoni këtë, ai do të jetë 90 vjeç” dhe “Ai paska bërë tatuazh gjithë fytyrën”, janë disa nga talljet e bëra nga Mihajloviç, që për disa tifozë konsiderohen me mungesë të theksuar respekti.
“Na vjen shumë keq që disa fjali të përfshira në një video të xhiruar në autobus dhe jo të destinuara për botim, të thënë me shaka dhe pa ndonjë qëllim fyes, gjithashtu për të lehtësuar tensionin e para-ndeshjes, kanë ngjallur pakënaqësinë e shumë tifozëve”, shkruan klubi. “Prandaj, ne do të dëshironim të përsërisim mirënjohjen tonë për të gjithë ata që sfiduan të ftohtin dhe borën dhe erdhën të brohorisnin ekipin pa qenë në gjendje të merrnin pjesë në ndeshje”.