Është vërtet një moment i keq për Cristiano Ronaldon, i cili do të detyrohet të hyjë në play-off me Portugalinë e tij për të rrëmbyer kalimin për Botërorin 2022, pas humbjes së bujshme në shtëpi kundër Serbisë. Fenomeni portugez nuk dorëzohet dhe inkurajon shokët e tij. “Futbolli na ka treguar herë pas here se, ndonjëherë, janë rrugët më të përdredhura që të çojnë në rezultatet më të dëshiruara”, shkruan ai në Instagram. “Rezultati i djeshëm ishte i vështirë, por jo i mjaftueshëm për të na rrëzuar. Objektivi për të qenë prezentë në Kupën e Botës 2022 është ende shumë i gjallë dhe ne e dimë se çfarë duhet të bëjmë për të arritur atje. Nuk ka justifikime. Portugalia do të shkojë në Katar”.
Nuk mjaftonin problemet dhe kriza e rezultateve me Manchester United: tani CR7 nuk gjen rehati as me kombëtaren e tij të dashur. Për habinë e të gjithëve, Portugalia fillimisht lejoi të rikuperohej dhe më pas u kalua nga Serbia në minutën e 90, një harahiri që i dha Vlahovicit dhe shokëve të tij biletën për në Katar, duke i detyruar luzitanët të shkojnë në playoff. CR7, në bilbilin e trefishtë, nuk ia fshehu zhgënjimin trajnerit Fernando Santos. E një ditë më pas, me mendje të ftohtë, ka ardhur postimi për të shkundur shokët e skuadrës duke dhënë edhe një paralajmërim për rivalët e tij: në Katar, fenomeni portugez absolutisht nuk dëshiron të mungojë…