“Isha në mision për vendin tim”: E veshur me ngjyrat e Ukrainës, Elina Svitolina dominoi rusen Anastasia Potapova 6-2 6-1 në raundin e parë të WTA në Monterrey. “Unë mendoj se misioni im është të bashkoj komunitetin e tenisit për të ndihmuar Ukrainën” – tha ajo pas ndeshjes -. Jam këtu për këtë. Dal në fushë për kombin tim dhe bëj maksimumin, duke përdorur burimet e mia për të ftuar njerëzit të ndihmojnë kombin tim”.
Svitolina, e cila ka premtuar të dhurojë paratë e fituara nga çmimet e turneve të ardhshëm për të ndihmuar rezistencën kundër pushtimit rus dhe për të ofruar ndihmë për popullatën civile që vuan prej një jave luftë, nuk po luan vetëm për veten e saj. “Unë luaj për kombin tim, për të ndihmuar ushtrinë ukrainase, njerëzit që kanë nevojë për ndihmë – shpjegoi ajo -. Çdo fitore e imja do të jetë shumë e veçantë”.
Numri 15 në botë dhe tenistja më e mirë ukrainase në renditjen e WTA, kishte shpjeguar se nuk donte të përballej me tenistet ruse dhe bjelloruse derisa WTA të mbajë një qëndrim, pas pushtimit të vendit të saj. ATP dhe WTA mbrëmë njoftuan se atletët që përfaqësojnë Rusinë dhe Bjellorusinë nuk do të mund të lidhen me emrin ose flamurin e vendit të tyre deri në një njoftim të dytë. Një pozicion që vjen pas vendimit të ITF për të pezulluar dy kombet, pra duke i përjashtuar nga të gjitha garat ekipore, mbi të gjitha Kupën Davis dhe Kupën Billie Jean King që Rusia e fitoi në 2021.