• |
ide | kryesore

Ekspertët e OKB-së: Në Ukrainë janë kryer krime lufte

-Instant, Lajme, Planet
krime lufte, Ukrainë, Rusi

Hulumtuesit e Kombeve të Bashkuara kanë ardhur në përfundimin se në Ukrainë janë kryer krime lufte gjatë sulmit të Rusisë.  Ata kanë përmendur bombardime të civilëve, ekzekutime të ndryshme, torturë dhe dhunë të tmerrshme seksuale.


“Bazuar në të dhënat e mbledhura nga Komisioni, është ardhur në përfundim se në Ukrainë janë kryer krime lufte”, ka thënë Erik Mose, udhëheqës i Komisionit për Hulumtime në Ukrainë.


Komisioni, i cili është krijuar në muajin maj për të hetuar krimet e luftës së Rusisë në Ukrainë, ka prezantuar të dhëna për shumë shkelje të kryera.

Mose ka thënë se ekspertët e Komisionit kanë pranuar dhe dokumentuar “supozime kredibile sa u përket disa rasteve të ekzekutimeve”.

Në gjetjet e panelit janë cituar dëshmi nga ish të ndaluarit e mbajtur në qendrat ruse. Ata kanë përmendur rrahje, goditje elektrike dhe zhveshje të detyrueshme.

Paneli po ashtu ka shprehur shqetësime të mëdha për ekzekutimet e kryera në rajonet e Kievit, Çernihivit, Harkivit dhe Sumoit. Në këto zona ka pasur prani të forcave ruse.

Mose ka theksuar se një numër i ushtarëve rusë është gjetur se kanë kryer krime në baza gjinore kundër njerëzve të moshave nga katër deri në 82 vjet.

“Ne jemi shokuar nga numri i madh i ekzekutimeve në zonat që kemi vizituar. Komisioni është duke hetuar këto vdekje në 16 qyteza dhe vendbanime”, ka thënë Mose.

Deklaratat e Rusisë

Rusia mohon vazhdimisht se shënjestron infrastrukturën civile dhe zonat e banimit, duke akuzuar Ukrainën se është duke keqtrajtuar të burgosurit rusë të luftës.

Presidenti rus, Vladimir Putin, ka shpallur më 21 shtator mobilizim të pjesshëm të rezervistëve ushtarakë për luftën në Ukrainë.

Ministri rus i Mbrojtjes, Sergei Shoigu, ka thënë në një intervistë televizive se do të mobilizohen 300.000 rezervistë me përvojë përkatëse ushtarake.

Lufta në Ukrainë ka nisur më 24 shkurt.

Vetë Putin e quan luftën si “operacion special ushtarak” për të çmilitarizuar Ukrainën.

Perëndimi është përgjigjur ndaj Rusisë, duke goditur ekonominë e këtij shteti me sanksione të ashpra.

Si pasojë e luftës kanë vdekur mijëra persona dhe miliona të tjerë janë zhvendosur nga shtëpitë e tyre./REL


2 Comments

Lini një Përgjigje

Adresa juaj email s’do të bëhet publike.