Pas rrëzimit me Erzenin, Tirana ndryshon marshin dhe dominon me poker Kukësin, duke i shkaktuar jo pak telashe Dobit. 4-1 imponohen bardheblutë në një ndeshje që u duk interesante deri kur Ndreca nuk e la skuadrën e tij me 10 lojtarë. Nga aty nuk pati më histori dhe Tirana rrëmbeu një fitore që e afron -1 nga vendi i parë.
Humbja e dytë radhazi me Kukësin, që rikthehet në situatë të vështirë. Bardheblutë triumfuan falë një pjese të dytë ku dominuan plotësisht, duke shfrytëzuar lojtarin më shumë, në mënyrën më të mirë të mundshme. E të mendosh që pas 45 minutave ku golit të Hasanit iu përgjigj Basa, u duk ekuilibër i madh. Golat u shënuan në harkun e 3 minutave nga e 43 në të 46, por një episod do të ndryshonte gjithcka.
Në të 57 Ndreca humb orientimin dhe ndërhyn egër ndaj Tosevskit. Arbitri Koçi i tregoi të verdhin, por u thërrit në VAR dhe pas rishikimit ndryshoi ngjyrën e kartonit. Me 10 lojtarë Kukësi nuk arriti më të bëjë asnjë rezistencë. Kjo u kuptua që në golin e Xhixhës të shënuar pas vetëm 6 minutash e të anulluar për pozicion jashtë loje. Pastaj në të 72 ishte Behiratche që kërceu mbi të gjithë në zhvillimet e një goditje dënimi dhe me kokë mposhti Tafas. Llogaritë i mbylli 10 minuta më pas Patrick, që shënoi golin e parë pas dëmtimit. Vulën pastaj e vendosi me penallti Limaj, edhe ai i rikthyer pas dy ndeshjeve mungesë. Për Dobin gjithcka nis nga e para dhe renditja e Kukësit tregon më mirë se cdo histori. Shehi në anën tjetër rikuperoi lojtarët dhe ktheu fitoren në shtëpi. Tani Partizani është vetëm një pikë larg.