Ministria e Brendshme e Maqedonisë së Veriut, ka bërë të ditur se kërcënimet që i janë bërë Aeroportit të Shkupit të premten, kanë rezultuar të rreme. Për këtë arsye është rikthyer orari i fluturimeve.
Në orët e mëngjesit nuk ka pasur fluturime nga Shkupi. Ndërkohë ato që e kanë pasur destinacion kryeqytetin maqedonas e kanë devijuar udhëtimin.
Përveç aeroportit, kërcënime për bomba ka pasur edhe në disa objekte të tjera. Si pasojë e këtyre kërcënimeve është evakuuar edhe hoteli “Aleksandar Palace”, ku ka qenë kryeministri maqedonas, Dimitar Kovaçevski dhe zyrtarë të tjerë të qeverisë.
“Menjëherë pas marrjes së denoncimeve, nga punonjësit e policisë janë marrë masa për evakuimin e sigurt të objekteve. Po kryhen kontrollet antiterroriste si dhe masat për zbardhjen e rasteve.”, është thënë në njoftimin e Ministrisë së Brendshme të Maqedonisë së Veriut.
Alarme për vendosje të bombave ka pasur edhe ditën e mërkurë në 49 objekte të arsimit dhe institucioneve tjera shtetërore. Ato janë shtrirë edhe në qytete të tjera si: Kumanovë, Kavadar, Shtip dhe Manastir.
Kryeministri, Dimitar Kovaçevski, ka thënë se institucionet po punojnë për zbardhjen e këtyre kërcënimeve. Ato kanë nisur më 26 tetor.
Ai ka thënë se dyshimet janë se bëhet fjalë për “luftë hibride, për futjen e frikës në mesin e popullatës dhe destabilizimin e vendit”. Institucionet janë në kontakt me NATO-n dhe faktorë të tjerë ndërkombëtar për ndihmë në zbardhjen e kërcënimeve. Sipas Ministrisë së Punëve të Brendshme, kërcënimet në postat elektronike vijnë nga jashtë Maqedonisë së Veriut./ REL