Kurti në Kuvendin e Kosovës: Asnjë kthim pas për të respektuar Kushtetutën. Hakmarrjes së Serbisë do i përgjigjemi me ligj

Kryeministri i Kosovës, Albin Kurti, duke folur për serbët e arrestuar, tha se janë ndaluar vetëm shtetasit e dhunshëm.

Policia e Kosovës po mbron institucionet nga milicia fashiste, tha Kurti gjatë raportimit në Kuvend për situatën në veri të Kosovës.

“Policia e Republikës natyrisht që i mbronte institucionet nga milicia fashishte. Arsyeja pse i kam përmendur emrat e tyre, sot janë gjashtë të arrestuar e 27 në arrati, kjo tregon se nuk e kemi me komunitetin serb, por personat e dhunshëm.

Ju garantoj se identifikimi dhe arrestimi i anëtarëve është bërë në përputhje të plotë me të drejtën penale të Kosovës. Policia e Republikës është njësia më e trajnuar pasi ajo është e trajnuar nga vendet mike, BE, SHBA e Mbretëria e Bashkuar. Policia e Republikës nuk bën gjueti shtrigash”.

Arrestimin e eksponentit të krimit, Milune Milenkoviç, e kam marrë vesh ashtu si ju, tha kryeministri para deputetëve.

“Unë, kryeministër i Kosovës e kam marr vesh si ju për arrestimin e eksponentit të krimit, Milune Milenkoviç. Mua më është krijuar përshtypja për përmasat që ka arrestimi i tij”.

Kurti foli për arrestimin e tre zyrtarëve të Policisë së Kosovës nga njësitë e Serbisë.

“Pas arrestimi të Milenkoviç, që në fakt pasoi me sulme të organizuara ndaj policisë, ushtarëve të KFOR-it e gazetarëve. Serbia shënoi edhe një akt agresioni duke rrëmbyer tre policë tanë. Ata të maskuar pa targa thellë në territorin e Kosovës kryen këtë akt.

I pari është ai i njësive speciale antiterror – SAI dhe ai i formacionit i njësive ushtarake, KOBRA. Më lejoni të them që një akt i tillë është në varianti më të mirë një akt qyqar, pasi rrëmbeu tre policë iku me shpejtësi nga vendi i ngjarjes dhe të gjithë policët nuk ishin për herë të parë aty. 16 rrugë ilegale që i kemi mbyllur, duhet të ketë policë që të mbikëqyrin, sepse në ato rrugë ka interes që edhe më tej kontrabanda të vazhdojë dhe do i kemi njësitet policore atje.

Këta policë nuk janë të pajisur për të mbrojtur kufirin, ata e kanë detyrë parësore luftimin e kontrabandës. Këta janë policë që ndalojnë një kamionë me gjëra ushqimore ose farmaceutike. Por Serbia i ka sjellë njësitet elite”.

Ne po presim të shohim sjelljen e Serbisë dhe faktorit ndërkombëtare, shtoi Kurti dhe theksoi se KFOR nuk duhet të heshtë.

“Vija kufitare është e përbashkët e KFOR-it dhe policisë. Kjo ndër të tjera për shkak të mandatit të tij dhe me marrëveshjen e Thaçit që pengon ushtrinë të shkojë në atë pjesë. Jemi në pritje të KFOR-it të marrë përgjegjësinë që të kthejë në Kosovë policinë dhe të mbajë përgjegjëse Serbinë.

Dje është shkelur neni 4 i marrëveshjes së Kumanovës, KFOR nuk duhet të jetë i heshtur ndaj një sulmi kidnapues, nëse KFOR e shndërron këtë heshtje dhe nënshtrim të heshtur në ligj që dihet publikisht të na e thotë hapur dhe të mohojë hapur një mision ndërkombëtar që ka”.

Kurti raportoi edhe për takimin me ambasadorët e QUINT-it.

“Policia do të punojë ditë e natë për t’i liruar policët. Kam pasur diskutime me Gabiel Escobar dhe Miroslav Lajcak e u takova me ambasadorët e QUIT i kemi informuar gjerë e gjatë për ditën e djeshme, tash kur po bëhen 30 orë, nuk e kemi deklaratën e KFOR-it kam shprehur protestën për mosreagim”.

Fakti që ndërkombëtarët kanë nisur mobilizimin për lirimin e tyre, lë të kuptohet se policët kanë qenë në territorin e Kosovës, sipas kryeministrit të Kosovës.

“Hakmarrjeve të tilla do u përgjigjemi me ligj e me rend. Asnjë kthim prapa as nënshtrim e as ndryshim të mendjes për të respektuar kushtetutën e vlerat evropianë të shtetit tonë të pavarur”.