Policia e Shtetit ka zhvilluar një operacion për kapjen e personave të shpallur në kërkim, që qarkullojnë me armë zjarri dhe të atyre që mbajnë në banesë armë, municion ose drogë.
Në operacionin ku u angazhuan 1852 punonjës, janë vënë në pranga 25 persona, 19 prej të cilëve të shpallur në kërkim kombëtar dhe 1 shtetas i shpallur në kërkim ndërkombëtar, kryesisht për vepra penale kundër personit, pronës dhe në fushën e narkotikëve. Pesë të tjerë u arrestuan në flagrancë për armë dhe drogë.
Mes të arrestuarve është edhe një 26-vjeçar i shpallur në kërkim ndërkombëtar, për llogari të Italisë, i akuzuar për vrasje dhe për grabitje me armë.