Zgjati vetëm një javë lufta për jetën e motoçiklistit spanjoll Carles Falcón, viktimë e një rrëzimi gjatë etapës së dytë të Rally, që po zhvillohet në Arabinë Saudite dhe që sapo ka hyrë në javën e fundit të garës. Në garë me një KTM private të TwinTrail Racing Team ai u rrëzua vetëm pesëmbëdhjetë kilometra nga fundi i një testi special prej gati katërqind e pesëdhjetë kilometrash, midis qyteteve Al Henakiyah dhe Al Duwadimi. Pasi iu dha ndihma, piloti dyzet e pesë vjeçar me origjinë nga qyteti katalanas i Tarragonas u dërgua në spital në Riad. Aty qëndroi në kujdes intensiv dhe në koma të induktuar derisa u riatdhesua në Spanjë tre ditë më parë, kur gjendja e tij kishte kaluar nga e rëndë në kritike.
Që në fillim shqetësuese ishte edema cerebrale, e cila bëri të pamundur kryerjen e një operacioni urgjent në rruazën cervikale C2. Falcón gjithashtu kishte pësuar fraktura në pesë brinjë, klavikul dhe kyçin e majtë. Piloti u transferua në Spanjë me një aeroplan mjekësor për të kryer teste të reja, me synimin për t’i shpëtuar jetën. Megjithatë, dëmtimi neurologjik i shkaktuar nga arresti kardio-respirator në momentin e aksidentit kishte rezultuar i pakthyeshëm.
NJOFTIMI I SKUADRËS
“Këtë të hënë, më 15 janar, Carles u largua nga ne. Ai ishte një person i qeshur, gjithmonë aktiv, i cili donte me pasion gjithçka që bënte, veçanërisht motorët. Ai na la duke bërë atë që ishte ëndrra e tij: të garonte në Dakar. Po argëtohej, ishte i lumtur në motorçikletë. Ne duhet ta kujtojmë atë për buzëqeshjen e tij dhe për lumturinë që krijoi te të gjithë”. Ky është teksti i njoftimit për shtyp me të cilin Ekipi TwinTrail Racing njoftoi fundin e shpresave për Carles, i cili për të dytin vit (pas vitit 2022) po merrte pjesë në garën në kategorinë “Original by Motul”.
MBI 80 VIKTIMA NË DAKAR
Me vdekjen e Falcón, tani janë rreth tetëdhjetë viktima të “Dakar” në dyzet e gjashtë vjet (nga 1979 deri në 2024) të historisë së turneut aventuresk që la Afrikën e Veriut në 2009 (pas anulimit të vetëm në 2008 për shkak të për paqëndrueshmërinë politike të rajoneve të kryqëzuara) për të kaluar në Amerikën Latine dhe pastaj përsëri – pesë vjet më parë – në Gadishullin Arabik. Lista përfshin pilotë që konkurrojnë me makina, motoçikleta dhe kamionë, stafin shoqërues, mediat dhe banorëve vendas. Edhe spektatorët e turneut janë pjesë e numërimit. Viktima e fundit para Falcón ishte – një vit më parë – një turist italian 69 vjeçar nga provinca e Torinos, i goditur nga një kamion garash që kapërceu një dunë.