Vetëm 3 ditë na ndajnë tashmë nga starti i turneut më të pritur në Botë dhe megjithë dëshirën për tu përqendruar vetëm në Kupën e Botës, futbollistët mendojnë edhe për merkaton. Portieri titullar i Brazilit, Alisson Becker, është në qendër të merkatos së verës, por ai dëshion të mësojë të ardhmen përpara fillimit të turneut.
Ylli i Romës, që cilësohet si një nga portierët më të mirë në botë, është përfolur gjithnjë e më tepër për transferime të rëndësishme me Liverpool dhe Real Madrid që po e monitorojnë situatën.
Por Alisson kërkon nga Roma të njohë sa më parë se ku do të luajë sezonin e ardhshëm, për të qenë i qetë në Rusi 2018, ku me Brazilin do të kërkojë të fitojë titullin botëror.
Alisson ka bërë të ditur se e ka lënë gjithcka në dorë të agjentëve të tij, por tre ditë janë shumë pak për të vendosur një lëvizje decizive, qoftë të anglezëve, që duan të largojnë hijet e gafave të Karius në finalen e Champions, por edhe të Madrid, që në pritje të ardhjes së trajnerit të ri, duan një portier me moshë më të re se Navas.