Ishte grupi “Pussy Riot” që ka marrë përgjegjësinë për pushtimin e fushës në fillim të pjesës së dytë në finalen e Kupës së Botës të dielën në Moskë.
Vajzat e këtij grupi njihen si kundërshtare të ashpra të presidentit të Rusisë, Vladimir Putin. Ato kanë gjetur rastin më të mirë për të treguar mospranimin e tyre për mënyrën si putin e drejton Rusinë duke ndërprerë një eveniment që ishte në sytë e gjithë botës. Vajzat hynë në fushë në minutën e 52-të dhe detyruan forcat security të ndërhyjnë menjëherë.
“Momentalisht, kemi 5 anëtare të Pussy Riot në fushë”, – shkroi ky grup në Facebook. Më vonë, një anëtare e grupit, Ogla Kurachyova, tha për Reuters se ajo ishte njëra prej 4 vajzave që u futen në fushë me vrap. Ajo ka treguar se është duke u mbajtur në një stacion policor në Moskë.
Ky grup tha se pushtimi i fushës ka qenë një protestë e shoqëruar me disa kërkesa përfshirë: lirimin e të burgosurve politikë, mosburgosjen e njerëzve për pëlqime në rrjetet sociale, ndalimin e arrestimeve ilegale në tubime politike, të lejohet gara politike në Rusi, të mos fabrikohen rastet kriminale dhe të mos arrestohen njerëzit pa arsye.
Pussy Riot fitoi famë pas një proteste brenda katedrales më të madhe të Moskës më 2012, për të cilën u arrestuan dhe burgosen 3 pjesëmarrëse. Prej atëherë, 3 vajza që u gjykuan janë ndarë, me dy nga të cilat – Nadezhda Tolokonnikova dhe Maria Alyokhina – që ende shfaqen ndaras duke e përdorur emrin Pussy Riot.
