Partizani fitoi në Kamëz, duke vazhduar rrugën drejt titullit kampion. Mjaftoi një gol i Asanit në fillimin e pjesës së dytë për të kaluar një pengesë, që në kushte të tjera do të kishte qenë “vërtetë” e vështirë. Por me gjysmën e titullarëve të Kamzës, për të mos thënë më shumë, që gjetën kohën të bojkotonin një situatë që zgjat prej muajsh, pikërisht në ditën e ndeshjes me kryesuesit e kampionatit, të cilëve i janë mirënjohës për qendrimin në Superiore sezonin e kaluar.
Por Partizani ishte shumë “etik”, për ta turpëruar kundërshtarin në shtëpi, kështu që mjaftoi goli i Asanit. Gjithnjë është ai, që nxjerr nga telashet skuadrën e Gegës, ndonëse këtë herë nuk bëhej fjalë për ta nxjerrë nga telashet, por për të legjitimuar fitoren, që komplikon pozitën e skuadrës së Gjokës, që e mori me shumë sportivitet situatën, por shtyn përpara të kuqtë në objektivin për të mbajtur 5 pikë larg Kukësin e frikshëm.
Ndeshja nuk kishte histori, ose historia e saj ishte pak e besueshme, duke parë mënyrën se si erdhën skuadrat në këtë sfidë. Blerjet e janarit nuk u panë tek Kamza, të tjerët kërkonin pagat e pamarra, ndërsa ata që luajtën nuk mund ti bënin rezistencë kryeqytetasve.