Ishte ëndërra e Tiranës, por duket se është e destinuar të mbetet e tillë. Andi Lila, mbrojtësi i përfaqësueses, sipas të gjitha mundësive do të vazhdojë të luajë në Superligën greke, edhe pas prishjes së kontratës me Pas Janina, kur skuadra ra një kategori më poshtë. Pikërisht në këtë fakt shpresonin bardheblutë për të marrë sërisht në skuadër 33 vjecarin, që me Tiranën ka luajtur nga 2008 në 2011. Por mbi mbojtësin, që është me parametër zero kanë bërë përpara dy klub greke, njëra prej të cilave është Pas Lamia, që sezonin e fundit e mbyll kampionatin në vendin e shtatë. Mbrojtësi ka luajtur 19 ndeshje për janiniotët për një total prej 1666 minutash, ndërkohë që në 7 vjet në Greqi ka koleksionuar 166 ndeshje, 7 gola e një assist.
Për Lilën ofertë konkrete ka bërë edhe Shkëndija e Tetovës, por mes tyre dhe Tiranës lojtari do të kishte zgjedhur bardheblutë. Lila e ka bërë gjithnjë të ditur se në Shqipëri do të luante vetëm për Tiranën dhe në këtë pikë të fortë të 24 herë kampionëve zinxhiri është këputur nga ndërhyrjet e klubeve greke. Dëshira e 33 vjecarit është të vazhdojë të luajë në një kampionat kompetitiv si ai grek, edhe pse ka lënë gjithnjë të hapur rikthimin një ditë tek Tirana, aty ku ndihet si në shtëpi…