Dy minuta larg fitores, pastaj errësirë. Kukësi humbet Superkupën, që deri në minutën e 88 u duk se e kishte në dorë, duke u dorëzuar përballë një Partizani, që pati momentet e tij të dobëta, por u zgjua në fund dhe në shtesë i udhëhequr nga një Brown, që me tregolëshin e shënuar, që fiksoi shifrat 4-2, kandidohet për një fanellë si titullari në formacionin e Franco Lerda. Tekniku italian merr fitoren e parë dhe trofeun gjithashtu, pas katër ndeshjeve të para në Europë ku skuadra e tij kishte shënuar vetëm një gol.
Një formacion i kujdesshëm i italianit, më shumë difensiv se mendohej, për tiu përgjigjur Kukësit të Duros, që ndryshoi hierarkitë në skuadër, duke u munduar që në më pak se një muaj në pankinë, ti japë fytyrën e tij Bluve. E megjithatë Mala shënoi golin e avantazhit në Elbasan Arena për të Kuqtë pas vetëm 6 minutash lojë, duke befasuar ish-teknikun Duro: në një kënd gati të pamundur mesfushori ndëshkoi portierin Avdyli, duke i dhënë startin e duhur skuadrës së Lerdës.
Por Partizani ka limite dhe i tregoi pas neglizhencës së parë, në kohën kur kishte dy raste për ta mbyllur ndeshjen. Rroca gjeti filtrimin inteligjent në prapavijën statike me Boldor, Bitrin e Belicën të ngadaltë dhe Musta pasi kaloi edhe Hoxhën barazoi rezultatin. Sic duket është mbrëmja e ish-lojtarit të Partizanit, që kompletoi dygolëshin me një goditje dënimi spektakolare, që shtangu Hoxhën dhe kaloi balancën e fitores nga Kukësi. Partizani në fakt humbi mes dëshpërimit, moralit të rënë dhe nervozizimit dhe Kukësi përdori aftësitë e organikës me Ethemi e Musollin që vertikalizonin dhe depërtonin, duke u ndalur dy herë nga traversa.
Ndoshta pika e kthesës, ndoshta sepse fati e donte kështu, por Partizani i hoqi Superkupën Kukësit nga dora vetëm dy minuta nga fundi, kur Brown u kujtua se si rol bën sulmuesin. Xhamajkani në minutën e 88 shënoi golin e parë me fanellën e Partizanit, edhe pse në tentativën e parë me kokë të tij, Avdyli reagoi saktë. 2-2 e coi ndeshjen në shtesë, por pikërisht aty Partizani përmbysi rezultatin.
Protagonistët e kthesës së kuqe janë gjithnjë dy: Trashi kroson dhe Brown shënon golin e dytë personal në minutën e 94. Xhamajkani, pasi u ekzaltua në luftën në ajër, tregoi aftësitë me të majtën, duke gjetur këndin e pambuluar të portierit Avdyli. Partizani hipotekoi rezultatin me golin e katërt në shtesë me të njëjtin sulmues. Brown, fiksoi tre golëshin personal, këtë herë duke përdorur të djathtën e duke i dhënë të drejtë Lerdas për zëvendësimin e duhur në momentin e duhur.
Partizani rrëmben kështu Superkupën, trofeu i dytë në historinë e klubit, me pak fat e strategji, duke pritur rikuperimin fizik të lojtarëve si Ekuban e Aristotel, që mund ti japin një tjetër impakt skuadrës, që konfirmohet kështu skuadra për tu mundur në kampionatin që do të nisë së shpejti.