Një makinë golash, por edhe një makinë parash. Cristiano Ronaldo do të fitojë në fakt 162 milionë euro falë kontratës së fundit të sponsorizimit me Nike. E kanë zbuluar këtë dokumentat e fundit të Football Leaks të publikuara nga revista gjermane Der Spiegel. Në kontratën, që do të zgjasë deri në 2026, shfaqet prezenca e një bonusi prej 4 milionë euro për faktin se ka fituar Topin e Artë.
Kampioni portugez – që nga Juventus përfiton 30 milionë euro në sezon – nga 2004 ka një kontratë sponsorizimi me gjigantin amerikan, që i ka “garantuar një komision bazë prej 3,65 milionë euro”. Përvec kësaj, lexohet në faqet e Bild, “derisa Ronaldo të luajë për një klub të kategorisë A, duhet të paguhet 16,2 milionë euro cdo vit”. Zbulimet e revistës gjermane janë likuiduar menjëherë nga Nike: “Nuk i komentojmë kontratat e sportistëve”.