Pas një heshtje të gjatë, të nesërmen e triumfit të Leclerc në Monza, mbërrijnë lajme për shëndetin e Michael Schumacher. Ish-piloti gjerman ka mbërritur sot në Paris, ku është transportuar në spitalin eropian “Georges Pompidou” për një trajtim “top sekret”. Lajmi bëhet i ditur nga mediat franceze.
Sipas Le Parisien, ndaj ish-kampionit të Formula 1, i cili u plagos rëndë në 2013 pas një përplasjeje ndërsa bënte ski, duhet të kryhet një transfuzion i qelizave burimore në trup, në mënyrë që të përfitohet një veprim “anti-inflamator sistemik”.
Trajtimi do të kryhet nga profesor Philippe Menasché, kardiokirurg i famshëm, pionier i terapisë qelizore në trajtimin e insufiçiencës kardiake. Menasché është gjithashtu në bordin e Institutit të trurit dhe palcës kurrizore. Kirurgu i famshëm ortoped, Gerard Saillant u pa gjithashtu në spitalin ku Schumacher është shtruar. Menasché dhe drejtuesit e Pompidou, të kontaktuar nga media franceze, nuk konfirmuan dhe as mohuan lojin e trajtimit ndaj të cilit do të nënshtrohet Schumacher duke lënë pas një mister mjekësor.
Burime franceze të lajmeve sigurojnë se Schumacher është sjellë të paktën dy herë të tjera kohët e fundit në Paris, e fundit pranverën e kaluar. Në qëndrimin e tij të parë, ish piloti u shtrua në Pitié-Salpetriere. Sipas raportimeve, Schumacher ishte menduar të kthehej në Paris për ekzaminime në korrik, por ky takim u shty për shkak të një problemi të papritur shëndetësor dhe data u zhvendos në fillim të shtatorit, pas kthimit nga pushimet të profesorit Menasché.