Për Marash Kumbullën nuk është momenti më i mirë, duke qenë se iu desh të bënte llogarinë me infektimin me koronavirus dhe se sikur të mos mjaftonte shtohen edhe dëmtimet. E megjithatë, ky i fundit ka kaluar pa pasoja të rënda për mbrojtësin shqiptar, që doli nga fusha para kohe në sfidën e fundit të Serie A kundër Bolonjës.
Janë dy, në fakt, lajmet e mira për Romën e Paulo Fonsecas. E para lidhet pikërisht me gjendjen e 20 vjecarit shqiptar. Kumbulla, pasi u detyrua të lërë fushën e lojës të dielën në kampionat, ka kryer kontrollet e nevojshme mjekësore që për fat kanë përjashtuar prezencën e lesioneve. Kështu, shqiptari do të jetë shumë shpejt në dispozicion të teknikut Fonseca, që ka marrë një tjetër lajm të mirë edhe nga rikuperimi i Mancinit, që është kthyer sot të stërvitet me grupin e të enjten do të jetë i grumbulluar kundër Torinos.