Short i ri kundërshtarë të vjetër: kjo është ajo që goglat e hedhura në Nyon të Zvicrës kanë hedhur për Kombëtaren shqiptare të futbollit për moshën U-21 në eleminatoret e Kampionatit Europian 2023. Nuk mund të quhet një short i pakalueshëm, por aspak i lehtë kjo është e sigurtë duke parë që nga emri i parë i dalë në Grupin G, Anglia. Kuqezinjtë e rinj do të jenë në grup gjithashtu me Republikën Çeke, Slloveninë, Kosovën dhe Andorrën. Tre nga këto skuadra, e më konkretisht Anglinë, Kosovën dhe Andorrën kuqezinjtë i kishin rivalë edhe në eliminatoret e Kampionatit Europian 2021, që u mbyllën nëntorin e vitit të kaluar.
Shorti i sotëm përcaktoi 9 grupet e fazës eliminatore të Europianit, nga të cilat 8 janë me nga 6 skuadra, ndërsa një grup ka 5 skuadra. Nëntë vendet e para të grupeve do të kualifikohen direkt për në fazën finale së bashku edhe me vendin e dytë më të mirë të eliminatoreve. Ndërsa 8 vendet e tjera të dyta do të përballen në play-off për të përcaktuar edhe katër skuadrat e fundit që do të sigurojnë biletën për në fazën finale të Europianit.
Pas një fushate të suksesshme në eliminatoret e Europianit të kaluar, kuqezinjtë u ngjitën këtë herë në vazon e katërt nga gjashtë në total së bashku me skuadra si Skocia, Uellsi, Hungaria, Finlanda, Irlanda e Veriut, Bosnje-Hercegovina, Bjellorusia dhe Maqedonia e Veriut. Paraqitjet e fundit pozitive të skuadrës së drejtuar nga trajneri Alban Bushi e kanë ngjitur Shqipërinë në renditjen e UEFA-s.
Ndeshjet e grupeve të Europianit për moshën U-21 do të luhen duke filluar nga muaji mars 2021 e deri në qershor të vitit 2022, ndërsa ndeshjet e fazës play-off do të luhen në shtator të vitit 2022. Faza finale e këtij turneu do të zhvillohet në muajt qershor-korrik 2023.