Sulmi me dron amerikan që vrau 10 civilë afganë ishte një gabim që nuk ka shkelur asnjë ligj, tha një inspektor i Pentagonit pas një hetimi. “Ishte gabim,” u tha gazetarëve inspektori i Forcave Ajrore të SHBA, gjeneral Sami Said.
Sulmi i 29 gushtit vrau tre të rritur, duke përfshirë një burrë që punonte për një grup ndihmash amerikane dhe shtatë fëmijë. Ngjarja ndodhi ndërsa vendet perëndimore u përpoqën të evakuonin afganët pasi talebanët morën kontrollin e vendit. Fëmija më i vogël që u vra ishte Sumaya dy vjeç dhe Farzad më i madhi 12 vjeç, tha familja për BBC.
Duke folur pak më pas, Ramin Yousufi, një i afërm, tha se kishte qenë një “sulm brutal” i bazuar në “informacione të gabuara”.
Said tha se kishte pasur “gabime ekzekutimi, të kombinuara me paragjykime konfirmimi dhe prishje të komunikimi që çuan në viktima civile.
Por ai tha se hetimi nuk kishte gjetur “asnjë shkelje të ligjit, duke përfshirë Ligjin e Luftës”. “Nuk është sjellje kriminale, sjellje e rastësishme, neglizhencë,” shtoi ai.
Ai tha se personeli amerikan që kreu sulmin me dron besonte vërtet se ata kishin në shënjestër “një kërcënim të menjëhershëm” nga grupi i Shtetit Islamik për forcat amerikane dhe stafin diplomatik në aeroportin e Kabulit.