Ylli i popit, Justin Bieber po përballet me thirrje në rritje për të anuluar koncertin e tij në Arabinë Saudite muajin e ardhshëm, ndërsa e fejuara e gazetarit të vrarë saudit Jamal Khashoggi i ka kërkuar atij në një letër të hapur që të mos performojë në garën e Formula 1 të mbretërisë.
Në letrën e publikuar nga The Washington Post, Hatice Cengiz i lutej këngëtarit të anulonte performancën e tij të 5 dhjetorit në qytetin e Detit të Kuq të Jiddah për t’i ‘dërguar një mesazh të fuqishëm botës se emri dhe talenti I tij nuk do të përdoren për të rregulluar reputacionin të një regjimi që vret kritikët e tij.’
Koncerti i Bieber është performanca më tërheqëse e planifikuar për garën në Jiddah, megjithëse interpretues të tjerë të koncerteve të F1 përfshijnë reperin A$AP Rocky, DJ-të David Guetta dhe Tiesto dhe këngëtarin Jason Derulo.
Koncerti i Bieber në Arabinë Saudite vjen pak para se ai të hapë një turne botëror në shkurt, i cili u riplanifikua nga viti 2020 për shkak të pandemisë. Koncerti dhe ngjarja sportive ka për qëllim gjithashtu të riemërojë vendin si një destinacion të dëshirueshëm turistik
Në letrën e saj, të botuar të dielën, Cengiz shkruan:
“Pak më shumë se tre vjet më parë, i fejuari im, gazetari dhe kolumnisti i Washington Post Jamal Khashoggi hyri në konsullatën saudite në Stamboll duke besuar se do të merrte disa dokumente të nevojshme për dasmën tonë të ardhshme. Në vend të kësaj, ai u vra brenda konsullatës nga operativë që vepronin me urdhër të princit të kurorës saudit Mohammed bin Salman. Ndoshta keni dëgjuar për rastin. Vrasja e tij brutale bëri bujë në mbarë botën. Që atëherë, shumë organizata dhe individë të të drejtave të njeriut, duke përfshirë edhe mua, kanë bërë thirrje për drejtësi dhe llogaridhënie.
Ju lutemi ta dini se ftesa juaj për të marrë pjesë në një koncert në Jiddah vjen drejtpërdrejt nga MBS, siç njihet princi i kurorës. Asgjë e rëndësishme nuk ndodh në Arabinë Saudite pa pëlqimin e tij, dhe sigurisht jo një ngjarje kaq e rëndësishme dhe që bie në sy si kjo.
Unë e di që ju jeni të përkushtuar ndaj fansave tuaj dhe po udhëtoni në Arabinë Saudite në emër të tyre. Megjithatë, ka qindra sauditë të të gjitha moshave, prejardhjeve dhe besimeve fetare, që lëngojnë në burg, të dënuar thjesht për shprehjen e kundërshtimit të tyre ndaj diktaturës së pamëshirshme saudite të MBS.
Vitin e kaluar, ju i keni shkruar ndjekësve tuaj: “Dua të përdor platformën që duhet t’u kujtoj njerëzve se racizmi është i keq dhe i rrënjosur në kulturën tone. Duke marrë parasysh këtë angazhim shumë të nderuar që keni bërë për të marrë një qëndrim kundër padrejtësisë, ju lutemi përdorni platformën tuaj tani për të mbështetur kauzën e të drejtave të njeriut në Arabinë Saudite. Nëse refuzoni të jeni peng i MBS-së, mesazhi juaj do të jetë i qartë: Unë nuk performoj për diktatorët, unë zgjedh drejtësinë dhe lirinë mbi paratë”.