Dizajneri dhe sipërmarrësi italian i modës Nino Cerruti ka vdekur të shtunën në moshën 91-vjeçare, sipas një deklarate te biznesit familjar italian Lanificio Fratelli Cerruti.
Ai vdiq në spitalin në Vercelli, Itali, ku u shtrua në spital për një operacion në kofshë, raportoi të shtunën dega e CNN SkyTg24.
“Për familjen, miqtë, bashkëpunëtorët dhe punonjësit e Lanificio Cerruti dhe gjithë botën e modës italiane, sot është një ditë shumë e trishtuar, për shkak të vdekjes së Signor Nino-s”, thuhet në deklaratën e kompanisë Lanificio Fratelli Cerruti të postuar në Facebook.
“Ne kemi humbur një njeri me talent, një stilist të jashtëzakonshëm, një njeri para kohës së tij dhe një mentor të mrekullueshëm, të cilit shumë njerëz i detyrohen kaq shumë”, thuhet në deklaratë.
Cerruti, i cili lindi në Biella, një nga qendrat kryesore të tekstilit të Italisë, ishte një figurë kyçe në industrinë ndërkombëtare të modës, i respektuar dhe i njohur për elegancën, mirësinë dhe sjelljet e tij.
Gjyshi i tij kishte themeluar një fabrikë tekstili në Biella në 1881, Lanificio Fratelli Cerruti. Duke u mbështetur nga përvoja e tij në prodhimin e pëlhurave të shkëlqyera, Cerruti u angazhua në prodhimin e veshjeve në fund të viteve 1950.
Koleksioni i tij i parë për meshkuj, Hitman, u shfaq në vitin 1957 dhe u konsiderua revolucionar në veshjet e meshkujve në atë kohë.
Linja e veshjeve për meshkuj Cerruti u lansua në vitin 1967 dhe do të pasohej nga një koleksion veshjesh për femra një vit më vonë.
Butiku i parë Cerruti u hap në vitin 1967 në Place de la Madeleine në Paris, ku Cerruti zhvendosi selinë e kompanisë për të qenë më afër kryeqytetit ndërkombëtar të modës. Prodhimi i pëlhurave me emrin Lanificio Fratelli Cerruti dhe labeli Hitman mbeti në Itali.
Në vitet 1980, Cerruti filloi një bashkëpunim me botën e filmit. Nga “Bonnie and Clyde” dhe “Pretty Woman” tek “Basic Instinct”, marka Cerruti dizajnoi rroba për aktorë si Michael Douglas, Jack Nicholson, Tom Hanks, Bruce Willis, Sharon Stone, Julia Roberts, Robert Redford, Harrison Ford, Al Pacino ose Jean Paul Belmondo.