Atalanta e paqartë mbi fatin e José Luis Palominos. Mbrojtësi argjentinas, i cili rezultoi pozitiv për clostebol në një kontroll antidoping të kryer në fillim të korrikut, tani rrezikon deri në dy vjet skualifikim, që mund të bëhen edhe katër nëse konstatohet qëllimi i përdorimit. Lojtari, i cili aktualisht është pezulluar si masë paraprake, ka tre ditë kohë për të kërkuar kundër-analiza, pas së cilës, nëse konfirmohet prania e substancës së ndaluar, do të gjykohet nga Gjykata Kombëtare Antidoping pas verës, gjithnjë nëse nuk zgjedh një marrëveshje për pranimin e fajësisë.
Clostebol është një steroid anabolik me prejardhje nga testosteroni i përdorur kryesisht në kremrat rikuperues. Kjo është e njëjta substancë që çoi, në vitin 2017, në skualifikimin një-vjeçar të Fabio Lucionit, kapiten në atë kohë i Beneventos.
Palomino u pezullua për shkelje të neneve 2.1 dhe 2.2, ato që kanë të bëjnë me “prezencën e një substance të ndaluar” dhe “përdorimin ose tentativën e përdorimit të një substance të ndaluar”. Rreziku i skualifikimit është shumë konkret: duke përjashtuar dashjen dhe duke marrë si të mirëqenë fjalën e lojtarit, siç po bën për momentin Atalanta, rregullorja antidoping përcakton në çdo rast se “nëse konstatohet shkelja [.. .] nuk është e nevojshme të demonstrohet qëllimi, faji, neglizhenca ose përdorimi i vetëdijshëm nga atleti”.
Masa e skualifikimit do të varet edhe nga përgjegjësia e mundshme e palëve të treta: në rastin e Lucionit u konstatua ajo e mjekut të ekipit të Beneventos, Ëalter Giorgione, i cili pranoi se i kishte aplikuar lojtarit një spraj rikuperues, që në përbërje të tij përmbante clostebol. Giorgione më pas u skualifikua për 4 vjet.
Siç raporton La Gazzetta dello Sport, mbrojtësi i zikaltërve nuk është në dijeni të asaj që po ndodh dhe tashmë ka filluar të kontrollojë ilaçet e marra në periudhën e fundit, madje edhe nga familja e tij. Ai së shpejti do të bëjë një bilanc me avokatët e tij dhe me shoqërinë bergamaske, do të kryejë kundër-analizat dhe më pas do të vlerësojë se si të veprojë. Megjithatë, sipas të gjitha gjasave, Dea do të duhet të bëjë pa të në fillim të sezonit.