Veriu i Kosovës vijon të ketë probleme. Për të katërtën ditë radhazi, në veri disa rrugë vazhdojnë të jenë të bllokuara. Kamionë të rëndë dhe mjete të tjera vazhdojnë të bllokojnë rrugën në fshatin Rudarë, në Zveçan. Që nga 10 dhjetori, serbët lokalë kanë ngritur barrikada në shenjë pakënaqësie me arrestimin e një ish-pjesëtari serb të policisë në Kosovë.
Ish-policit, Dejan Pantiç, i është caktuar masa e paraburgimit prej një muaji. Ai po dyshohet se ka organizuar sulmin terrorist ndaj zyrave të Komisionit Qendror të Zgjedhjeve në veri të Kosovës më 6 dhjetor. Aty janë sulmuar zyrtarët e KQZ-së dhe zyrtarët policorë.
I dërguari i Shteteve të Bashkuara për Ballkanin Perëndimor, Gabriel Escobar, është takuar dje me presidenten e Kosovës, Vjosa Osmani. I pranishëm në takim ishte dhe kryeministri i Kosovës, Albin Kurti. Në komunikatat e lëshuara nga këto institucione është thënë se liderët e Kosovës kanë biseduar me Escobarin për nevojën e largimit të menjëhershëm të barrikadave.
Bashkë me Escobarin, vizitë në Ballkan ishte planifikuar edhe këshilltari i lartë i Departamentit amerikan të Shtetit, Derek Chollet. Mirëpo ai e ka anuluar vizitën, si pasojë e infektimit me koronavirus. Chollet ka thënë se pret që vizitën në këtë rajon ta realizojë në fillim të vitit të ardhshëm.