Është arrestuar edhe një person tjetër për vrasjen e kuksianit Visart Cengut, të martën e 3 janarit, në lokalin “Kobra City” në Prizren. Arrestimi është konfirmuar nga Policia e Kosovës.
Burimet e Gazetës Sinjali bëjnë me dije se i arrestuari është Roland Susuri, i cili dyshohet se ka nisur i pari sherrin aty.
Sipas policisë, i dyshuari është dërguar në paraburgim me vendim të prokurorit.
Gazeta Sinjali raportoi se pushimet rezultuan tragjike për Visart Cengun. 31-vjeçari nga Kukësi, por që jetonte dhe punonte në Francë, mbeti i vrarë orët e para të mëngjesit të së martës pas të shtënave me armë zjarri në dalje të lokalit ‘Kobra City’ në Prizren.
Keq e pësoi edhe miku i tij, 27-vjeçar, Rufgen Shehu, i cili mbeti i plagosur, por jashtë rrezikut për jetë. Armën dyshohet se e shkrepi pikërisht pronari i lokalit, personazhi i njohur kontrovers, Dibran Hoxhaj.
Sinjali ka mësuar ekskluzivisht se motiv i këtij konfliktit dyshohet të ketë qenë fatura prej 400 eurosh që lokali kishte lëshuar për dy viktimat. Sipas informacioneve të para, sherri nisi pasi të rinjtë nga Kukësi nuk u pajtuan për ta paguar këtë shumë të të hollave.
Këtë e ka konfirmuar edhe prokurorja e Prokurorisë Themelore në Prizren, Nazan Shero, e cila i tha Gazetës Sinjali dje se shuma prej 400 eurosh është përmendur edhe nga dëshmitarët si një motiv i mundshëm për vrasjen./Sinjali