Një grup fëmijësh të vegjël të një shkolle fillore kanë pësuar lëndime, pas një aksidenti me autobus. Ishin 45 nxënës në autobus kur raportohet se u goditën nga pas nga një kamion dhe u përmbys në Melburn, Australi.
Shërbimet e urgjencës dhe kalimtarët e rastit shkuan në vendngjarje për të ndihmuar dhe 21 fëmijë, të moshës 5 deri në 11 vjeç, u dërguan në spital, ku shumë prej tyre kërkonin ndërhyrje të menjëhershme kirurgjikale. Drejtuesi i kamionit është akuzuar për katër akuza për drejtim të rrezikshëm duke shkaktuar lëndime të rënda.
Mbikëqyrësi i policisë së Viktorias, Michael Cruse, tha se ka të ngjarë të ketë edhe më shumë akuza dhe se disa nga lëndimet e pësuar janë “me të vërtetë shumë traumatike”.
Autobusi me fëmijë ishte në një ngjarje atletike dhe kur po ktheheshin në shkollë, ndodhi përplasja tronditëse.
Policia tha se kamioni goditi pjesën e pasme të autobusit të shkollës dhe bëri që ai të përmbysej në një kryqëzim në komunitetin gjysmë rural të Eynesbury..
Ekuipazhet e zjarrfikësve të urgjencës hynë në autobus përmes një xhami në çatinë e tij dhe xhami i thyer u përdor si dalje kryesore emergjente për të nxjerrë fëmijët.
Shefja ekzekutive e Spitalit Mbretëror të Fëmijëve në Melburn, Bernadette McDonald, konfirmoi natyrën katastrofike të lëndimeve që pësuan disa nga fëmijët. Shoferi i autobusit u dërgua në spital me lëndime të lehta, por nuk u pranua, ndërsa drejtuesi i kamionit, nuk u lëndua.
Në fundjavë, të paktën 26 persona, përfshirë një foshnjë dhe fëmijë, u vranë pasi një minibus shpërtheu në flakë në një përplasje shkatërruese me një kamion në Meksikë.