“Sipas meje mund të bënim shumë më mirë nga pikëpamja e paraqitjes. Paraqitja nuk ishte e mirë. Ndodh që të barazosh me Tiranën dhe nuk është rezultat i keq. Ishte më mirë një paraqitje shumë më e gjallë. Por ndodh, presioni i derbit, momenti…”. Giovanni Colella komenton kështu barazimin 1-1 me Tiranën, që mban bardheblutë në krye të renditjes tre javë nga fundi.
Tekniku i Partizanit bën sikur nuk e kupton rëndësinë e ndeshjes që nuk arriti të fitojë. Sigurisht nuk është e lehtë të fitosh një derbi e me një skuadër kryesuese, por e goditur nga mungesat Tirana ishte praktikisht pa pankinë. Për më tepër, mungonte golashënuesi më i mirë i kampionatit e qendërsulmues luante një anësor. “Sipas meje, është një nga paraqitjet më të dobëta që kemi bërë. Nuk jam i kënaqur nga paraqitja, mund të bënim më mirë, absolutisht. Pavarësisht kësaj ishim në avantazh. Por kur luan ndaj skuadrave të forta është kështu”.
Lexo më tej: Video/ Deliu i heq dorën nga titulli Partizanit: Tirana mbron kreun me një barazim mes incidenteve e polemikave
Colella mbetet i dyti, por është i pari për justifikime: “Tirana me mungesa? Është normale, nëse kanë një mentalitet të mirë dhe të përgatitur siç janë, e përballojnë edhe mungesën e elementëve. Edhe ne na ka ndodhur që të mbajmë një ndeshje me mungesa. Kemi luajtur edhe më mirë se kjo e sotmja – tha Collela -. Kur një skuadër ka mungesa, çdokush e parashikon që fitohet ndeshja. Por nuk është e vërtetë. Duhet t’i japim merita kundërshtarit që u tregua i aftë, më i aftë se ne. Duhen komplimentuar për barazimin”, tha Colella pas ndeshjes.