Nënkryetari i Komunës së Skenderajt dhe kryetari i Partisë Demokratike të Kosovës në këtë komunë, Sami Lushtaku është thirrur mbrëmjen e kësaj të premteje në zyrat e EULEX-it në Fushë Kosovë. Këtë e ka konfirmuar djali i tij, deputeti Mërgim Lushtaku, i cili tha se babai i tij është shoqëruar nga avokati i tij.
“Po, janë duke biseduar me avokatin, pasi sipas të gjitha gjasave është vetëm për çështjen e telefonit. Sipas avokatit, është aty vetëm për telefonin”, – tha ai.
Lushtaku ka dalë nga zyrat e EULEX-it në orët e vona. Avokati i tij Artan Qerkini bëri me dije se Lushtakut i është konfiskuar telefoni nga Specialja. Ai shtoi se Lushtaku nuk është i dyshuar për ndonjë vepër dhe se nuk ka pasur ndonjë urdhër-arresti ndaj tij.
Lushtaku nuk ka bërë asnjë deklaratë para mediave se për çfarë arsyeje është marrë në pyetje. Ai është larguar nga zyrat e EULEX-it në Fushë Kosovë me makinën e tij. Specialja bastisi një ditë më parë edhe shtëpinë e ish-komandantit të UÇK-së Sulejman Selimi.
Sami Lushtaku ka qenë pjesëtar i UÇK-së. Në mars 1998 u plagos në Krushë të Madhe duke sjellë armatim nga Shqipëria bashkë me Sylejman Selimin dhe të tjerë. Ai ka qenë komandant në zonën e Drenicës. ©LAPSI.al