“Mërzitja është, sepse pësuam dy gola me episode aty ku kemi pikën më të fortë, goditjet standarte, kemi shtatlartësi. Kishim një nervozizëm të pakuptimtë pas 10 minutave lojë, nuk e di nga vjen te lojtarët. Por mbi të gjitha më mirë që ndodhi në këtë moment, se kemi pushim para e kemi mundësi të rikuperojmë”. Edlir Tetova nuk shpjegon dot asgjë nga sa po ndodh me Egnatian e tij. Kryesuesit e kampionatit, të mundur 2-0 nga Skënderbeu, kanë arritur në ndeshjen e shtatë radhazi pa fitore. “Nuk ka ngërç, ekipi ka luajtur futboll, ka shkuar para portës e nuk ka bërë gol. Ngërçi është vetëm te shënimi i golit. Montenegro po sakrifikon, është i vetmi sulmues i skuadrës që po merr minuta pa fund e nuk i bën shumë mirë për momentin”.
Tetova tani rrezikon vendin e parë, edhe pse udhëhoqi kampionatin për tre faza: “Puna e premios besoj se është shtysë për të gjithë, edhe për klubin e lojtarët. Te pjesa e konkurrencës, çdo lojtari i bën mirë. Në stërvitje kishte doza të mira se të gjithë kanë pasur minutazhin e duhur dhe janë shfaqur mirë. Mendoj se ndeshjet fitohen në stërvitje. Kur ke konkurrencën e mirë, që në fundjavë në fushë, edhe kur heq një lojtar, çdo gjë të jetë në rritje”.
Rotacioni ka qenë një ide që tekniku e ka patur në kokë që kur nisi mungesa e rezultateve, por duket se Tetova po i qendron mendimit të tij, pavarësisht se rezultatet nuk i japin të drejtë: “E kam në kokë kush do të jetë ajo 11-she që do të na përfaqësojë, por gjithmonë edhe ata që angazhohen me minutazhin e duhur, janë fitore për çdo ekip”.
GVOZDENOVIC: “DUAM TË FITOJMË ÇDO NDESHJE”
“Jam shumë i lumtur e i kënaqur, çunat e meritojnë gjithçka. Sot ishte ndeshje e bukur, e dominuam, ishim shumë mirë në fazën mbrojtëse, në ekuilibër. Sot ishte futboill direkt në fazën sulmuese kur fitojmë topin. Çunat e meritojnë dhe ishin të zgjuar, e dinim si do menaxhohej situata, si do mbrohej rezultati. Tre pikët ishin shumë të rëndësishme për ne sot”. Ivan Gvozdenovic nuk përmbahet, pas fitores me Egnatian, që forcon pozitat e Skënderbeut në vendin e katërt në renditje. Tekniku serb kujton edhe shtyllën e rrogozhinasve: “Nëse shënonte, shkonte 2-1, pastaj kush e di se si mbarojmë. Por fati është pjesë e lojës, çunat meritojnë edhe fat. Dëshira e madhe është të fitojmë çdo ndeshje, është e vështirë por do e provojmë”.
Lexo më tej: Franklin trondit Egnatian: Tetova del i shkatërruar nga Korça dhe rrezikon kreun
Bardhekuqtë duan ta mbyllin kampionatin në katërshe, për të patur një shans për titullin. Përvec Vllaznisë, me të cilën kanë vetëm humbje, ata e kanë luajtur hapur edhe me Partizanin e aq më tepër me Egnatian: “Sigurisht do provojmë të rrimë në katërshe. Dinamo e Tirana janë afër, Dinamo ka edhe një ndeshje, gjithçka është e hapur, ka edhe 8 javë. Sigurisht kemi besim të madh dhe do vazhdoje e luftojmë”.