Çështja “dosierazh” që doli nga hetimi i Perugias nuk ka prekur vetëm figura të politikës, ekonomisë dhe argëtimit, por edhe botën e sportit. Përveç presidentit të FIGC-së, Gabriele Gravina dhe atij të Lazios, Claudio Lotito, në fakt doli se në qendër të një plani spiunazhi kishte përfunduar edhe Juventus. Sipas asaj që raporton “Corsport”, janë zbuluar dosje të paligjshme për të goditur shoqërinë torineze gjatë viteve të presidencës së Andrea Agnelli. Në veçanti, flitet për ndërhyrje të paligjshme në sistemet e informacionit që kishin të bëjnë me provimin e Suarez, Super League, rikthimin e teknikut Allegri, lamtumirën e Cristiano Ronaldo, por edhe llogaritë e vetë presidentit të Juventus.
SPIUNIMET QË NXITËN HETIME KUNDËR JUVENTUS
Objektivi ishte gjetja e provave për krime të mundshme për të hedhur në erë drejtuesit e mëparshëm ose të paktën për t’i vënë në vështirësi. Gjë që pastaj ndodhi me hetimin e Prisma, i cili efektivisht hodhi në erë Bordin e Drejtorëve dhe ndikoi në rezultatet e skuadrës sezonin e kaluar, i cili u përjetua mes gjyqeve dhe penaliteteve. Në Prokurorinë e Perugias, në hetimin e kryer nga prokurori Cantone, dyshohet se në raste të tilla fshihet puna e errët e “spiunëve” të punësuar për të hapur procedime që në të kundërt nuk do të kishin pasur mundësi të nisnin.
Ashtu si në historinë e provimit farsë të Suarez, për të cilin sipas “La Verità” u zbulua veprimtaria e paligjshme e një prokurori të drejtorisë kombëtare antimafia dhe një togeri nga Departamenti i Financave, të akuzuar për hyrje të paligjshme në sistemet e informacionit, për të qenë në gjendje të hetojë subjekte “të pavëmendshme”.
Lexo më tej: Allegri, xhaketa e flakur, misioni në Madrid e 405 pankina me Juventus: “Njeri e trajner me fat”
Por doli gjithashtu se edhe llogaritë bankare të presidentit Agnelli u kontrolluan një ditë pas shpalljes së Super League. E se pak ditë pas njoftimit të rikthimit të Max Allegri te Juventus, u përfolën pagesat jashtë vendit që i atribuoheshin lojërave online. Ashtu si u hetua edhe llogaria e Cristiano Ronaldo kur filluan të qarkullojnë thashethemet për lamtumirën e tij nga Zonja, në përpjekje për të prishur transfertën e nevojshme për të shpëtuar llogaritë e bardhezinjve. Tashmë mbetet për t’u zbuluar vetëm emrat e “dërguesve”.