7 shqiptarë kanë rënë në pranagt e policisë belge për kultivim kanabisi. Sipas raportimeve, autoritetet kanë arrestuar 8 persona, ku 7 prej tyre janë me origjinë nga Shqipëria dhe 1 tjetër nga Gjermania. Bëhet me dije se hetimi i policisë belge, për bandën shqiptare filloi në mesin e vitit 2023 pas inspektimit të një furgoni gjatë një operacioni policor ndërkombëtar pranë kufirit holandez, ku gjatë kontrollit, policia gjeti kuti lulesh dhe plehra në makinën e një 37-vjeçari shqiptar.
Gjithashtu departamenti lokal i hetimit të drogës në PZ Antwerp, zbuloi më vonë bandën shqiptare që drejtonte plantacione kanabisi në Belgjikë. Gjyqtari hetues urdhëroi kontrolle në Antwerp, Flemalle, Heusden-Zolder, Leut dhe Maasmechelen. Po ashtu policia zbuloi tre plantacione aktive, ku u gjetën afërsisht 43 kilogramë kanabis të korrur, si dhe mbi 500 copa dhe 1000 bimë të pjekura. Mësohet se janë ndaluar 11 të dyshuar, tetë prej të cilëve u arrestuan pas akuzës.
Bëhet fjalë për shtatë shqiptarë dhe një gjerman nga mosha 20 deri në 54 vjeç. Hulumtimet e mëtejshme do të duhet të zbulojnë nëse ka plantacione të tjera aktive. Gjatë kontrolleve, policia lokale mori mbështetje nga njësi të ndryshme, duke përfshirë njësinë e lëvizshme, njësitë speciale të policisë federale dhe zonat e policisë lokale. Ndërkohë që bëhet e ditur se rasti është akoma nën hetim, pasi policia dyshon për përfshirje më të gjerë të rrjeteve të trafikantëve të lëndëve narkotike.