Belgjika thyen 3-0 Panamanë në ndeshjen e luajtur në Fisht Stadium në Sochi, duke marrë provizorisht vendin e parë në Grupin G. Një lojë e dominuar totalisht nga belgët, që nuk arritën në asnjë moment të kalonin portierin Penedo në pjesën e parë, por në të dytën u ngjitën në katedër duke shënuar tre gola dhe duke rrëmbyer 3 pikët e para.
Ndeshje me sens unik, me Lukaku e Carrasco tentuar kuadratin e portës së amerikano-qendrorëve që në minutat e para, duke lënë të kuptohej se ishte cështje kohe shënimi i golit. Por në fakt nuk ndodhi kështu. De Bruyne goditi mbi traversë në minutën e 22, ndërsa portieri panamez u tregua i pakalueshëm 16 minuta më pas në goditjen e Carrascos.
Panamaja e teknikut Gomez mendoi vetëm të mbrohej. U duk se do të thyhej, por për 45 minuta i rezistoi yjeve të Belgjikës.
Por vetëm për një pjesë loje sepse Belgjika shënoi golin e avantazhit me Dries Mertens. Sulmuesi i Napolit ka goditur fluturimthi në minutën e 47, duke e bërë të pavlefshme hedhjen e portierit Penedo. Spektakolar goli i shënuar nga shtatshkurtri, që i jep avantazhin provizor Belgjikës 1-0 ndaj Panamasë.
Nuk u ndal në asnjë moment Belgjika, që dyfishoi shifrat me shënuesin më të mirë të historisë. Romelo Lukaku shënoi me një goditje të saktë me kokë në minutën e 69, pas një asist të De Bruyne. Ndëshkoi Panamanë sulmuesi i Manchester United, që qetëson Djajtë e Kuq me golin e sigurisë.
Nuk ka mbaruar show i numrit 9. Dygolësh personal i Romelo Lukakut, që realizon edhe golin e tretë për Belgjikën. Sulmuesi i Manchester United, vulos suksesin përballë Panamasë, duke u treguar i saktë para portës.
Përfundon me fitoren e Belgjikës 3-0, me skuadrën e teknikut Roberto Martinez që merr tashmë kryesimin e Grupit G, ndërkohë që Panamaja e fillon keq, por në fund të fundit nuk është se pritej ndryshe përballë një prej pretendentëve për Kupën në Rusi 2018.