Në Skoci e bëjnë shembull. Një djalosh 15 vjecar, tifoz i Glasgow Rangers, është dënuar përjetë të mos futet në Ibrox Stadium, pasi i ka bërtitur Scott Brown, kapitenit të rivalëve të Celtic, “Ku është motra jote?” në përfundim të Old Firm.
E motra e kapitenit Brown, Fiona, është ndarë nga jeta në vitin 2008 për shkak të një tumori. Mesfushori, duke e dëgjuar pyetjen, është bllokuar në fushë, duke nisur të shohë me përcmim adoleshentin, që është identifikuar me shpejtësi nga policia. Tani erdhi edhe vendimi i Rangers, duke treguar qartë se skena të tilla nuk kanë vend në futboll, sepse edhe mes rivalëve të mëdhenj duhet të ketë respekt.