Nuk gjen paq cështja Elseid Hysaj. Pas sulmit të ultrasve fashistë të Lazios, ka ardhur një tjetër deklaratë e klubit por edhe një mobilizim i vërtetë i tifozëve në mbrojtje të shqiptarit. Pas videos të së shtunës në mbrëmje, në të cilën mbrojtësi këndoi “Bella Ciao”, mbi shkodranin kanë vërshuar fyerje shumë të ashpra në mediat sociale për lidhjen e asaj kënge me periudhën e Rezistencës. Dje shoqëria ndërhyri për të mbrojtur lojtarin e saj nga rreziqet e instrumentalizimit personal dhe politik. Në mbrëmje, në urën Corso Francia në Romë, më pas u shfaq një banderolë që rindezi çështjen. “Hysaj o krimb, Lazio është fashiste”, fjalët e nënshkruara nga Ultras të Lazios.
Sot, klubi bardhekaltër bëri një deklaratë tjetër në lidhje me zhvillimet e fundit. “Klubi Sportiv Lazio dënon me forcë parrullën e turpshme kundër lojtarit Elseid Hysaj – lexohet në shënimin në faqen e internetit të klubit -. Nuk është episodi i parë i këtij lloji. Ne kurrë nuk do të jemi në krah të atyre që mohojnë vlerat e sportit. Nga ana tjetër, ne jemi pa mëdyshje në krah të atletit tonë dhe të të gjithë lojtarëve të tjerë të impenjuar në këto javë të grumbullimit para-sezonal. Distancohemi fort nga ata që duan të shfrytëzojnë për qëllime politike këtë histori që dëmton ekipin, të gjithë tifozët e Lazios dhe shoqërinë. Ne nuk do të frikësohemi nga ata që përdorin tone të dhunshme dhe agresive: për ta nuk ka hapësirë në botën tonë e cila në vend të kësaj frymëzohet nga vlerat e shëndetshme sportive të besnikërisë dhe konkurrencës, respektit reciprok dhe bashkëjetesës civile dhe që synojnë të kapërcejnë të gjithë gardhet e natyrës shoqërore, kulturore, ekonomike dhe racore”.
Ndërkohë, tifozët bardhekaltër po mobilizohen për të treguar solidaritetin e tyre me mbrojtësin. Tashmë 12,000 persona janë bërë pjesë e hashtagut #IostoconHysaj (unë jam me Hysaj). Pozicionimi në favor të Hysaj po rritet me shpejtësi, i cili do të jetë në fushë këtë pasdite në provën Auronzo të Lazios kundër ekipit vendas të Fiori Barp Sospirolo.