Makthi që kishte mbërthyer botën që nga fundi i vitit 2021 u kthye në realitet. Në orët e para të mëngjesit të së enjtes, trupat ruse u futën në Ukrainë, ndërsa shpërthime të shumta u dëgjuan në qytete të ndryshme të vendit, përfshi edhe kryeqytetin Kievin. Mediat ndërkombëtare raportojnë se 7 persona kanë humbur jetën pas bombardimeve ruse dhe 9 të tjerë janë plagosur. Ndërkohë 19 persona të tjerë janë shpallur të zhdukur pas nisjes së sulmeve.
Presidenti Volodymyr Zelensky konfirmoi raportimet për sulm me predha në vendin e tij. Ai tha se Rusia ka sulmuar rojet kufitare dhe disa infrastruktura të Ukrainës. Sipas raportimeve, ushtria ruse nisi me pushtimin e Ukrainës nga disa fronte: konkretisht trupat kaluan kufirin nga Bjellorusia, Krime dhe krahinën e Donbasit. Ushtria ruse me anë të një deklaratë njoftoi se nuk hasi në asnjë rezistencë nga ana e rojeve kufitare ukrainase gjatë nisjes së pushtimit.