Vllaznia shembet 1-2 në Shkodër e befasuar nga një goditje ‘tradhëtare’ e shkodranit Edon Hasani, që i dhuroi tre pikë shumë të rëndësishme Kastriotit, që parakalon sërisht Egnatian në renditje. Dy humbje dhe një barazim është bilanci i tre ndeshjeve në pankinën e kuqebluve, me fitoren që mbetet mirazh për teknikun që zëvendësoi Brdaric në pankinë. Tani edhe vendi i katërt nuk është më i sigurtë për kuqeblutë që kanë një pikë prapa Partizanin, ndërsa Kastrioti ka hedhur një hap të sigurtë drejt mbijetesës me fitoren në “Loro Boriçi”.
E të mendosh që pas një pjese të parë ku Latifi në minutën e 5 e Hoxhaj në të 43 ishin rreziqet e vetme të krijuara nga shkodranët, me midis rastin e Kaina Nunes në minutën e 11, me parabolën që shkoi ngjitur me shtyllën, kuqeblutë e nisën të dytën në avantazh me golin e Aralicës vetëm pas disa sekondave të fillimit. Kroati shënoi duke kaluar vendasit në avantazh, por vetëm 10 minuta nga fundi, ishte ish-i i Vllaznisë, Edon Hasani, që përmbysi shifrat. Shkodrani i krutanëve shënoi dy herë në 7 minuta, duke ndëshkuar Zogovic në të 79 dhe 86. Kastrioti kështu forcon pozitat në rasport me zonën e rënies nga kategoria, ndërsa Vllaznia humbet shansin për t’u afruar me shumë me Kukësin në zonën europiane.