Në orët e fundit në Napoli është përhapur një thashethem i bujshëm sipas të cilit De Laurentiis ka shitur klubin napolitan te një fond i huaj, madje duke zbuluar edhe shifrat e marrëveshjes. Nuk bëhet fjalë për një pëshpërimë lagjesh, por një lajm i vërtetë i raportuar nga Tg Regionale Rai i Kampanjës. Menjëherë, shoqëria lëshoi një deklaratë në të cilën e mohoi kategorikisht njoftimin, duke e quajtur atë si një mashtrim.
“Papritur Rai afirmon, në një raport në Tg Regionale të Kampanjës, se Napoli i është shitur një fondi për 650 milionë”. Kështu hapet komunikata për shtyp e klubit napoletan lidhur me lajmin për shitjen e pretenduar të klubit. “Në një situatë normale, një gomarllëk i këtij lloji nuk duhet as të mohohet – vijon shënimi – por duke qenë se Rai (që si burim flet për “të dhëna”) është një “shërbim publik”, jemi të detyruar ta bëjmë këtë. De Laurentiis nuk ka ndërmend të shesë Napolin dhe nuk ka negociata që janë duke u zhvilluar”.
Me përhapjen e lajmit, thashethemet në qytet ndoqën pashmangshmërisht njëri-tjetrin gjatë gjithë ditës. Nga këtu erdhi domosdoshmëria për mohim, me shtimin e disa prapaskenave: “Ndër të tjera, në të kaluarën, (De Laurentiis) ka refuzuar oferta afër një miliardë dollarësh. Lidhja që bëhet, për të ndezur këto “thashetheme”, është se presidenti De Laurentiis do të donte të jetonte në SHBA”. De Laurentiis ka jetuar gjithmonë midis Los Anxhelosit dhe Italisë – vazhdon shënimi – dhe së fundmi është kthyer nga një qëndrim rreth një muaj në rezidencën e tij në Kaliforni. Ai nuk ka nevojë të shesë Napolin për të qëndruar në Shtetet e Bashkuara kur e kërkojnë angazhimet e tij”.