Fitorja disi e vuajtshme ndaj Lecce i lejoi Juventus të shkëputet me dy pikë të tjera nga skuadrat që tani zënë vendin e katërt. Bardhezinjtë janë në kërkim të sigurimit të zonës Champions League. Tani janë pesë pikët që i ndajnë bardhezinjtë nga Milan, Roma dhe Atalanta. Por nuk ka kohë për t’u çlodhur, sepse skuadra e Max Allegri do të jetë e impenjuar në Bergamo të dielën. Një sfidë thuajse vendimtare, për të mos rrezikuar të përfshihen në drithërima, në prag të gjysëmfinales së Europa League kundër Sevilla. Një takim, shumë i ndjerë nga tifozët, por edhe nga klubi, që dëshiron të rikthehet të ngrejë një trofe ndërkombëtar. Natyrisht, pastaj, është gjithmonë shpata e Demokleut e drejtësisë sportive dhe e UEFA-s, që i rri mbi kokë Zonjës, por fusha, sot, duhet të jetë prioriteti i trajnerit dhe lojtarëve.
Rikthimi te fitorja pas një serie të gjatë humbjesh dhe barazimesh mund të bëjë vetëm mirë për moralin e grupit. E në veçanti për Dusan Vlahovic, që ndaj salentinëve prishi agjërimin, që rrezikoi ta çonte në humnerën e një krize nervore. Një gol brilant me aksion i pritur prej kohësh, me shpresën që të jetë vetëm i pari i një serie vendimtare në momentin kryesor të këtij sezoni.
Lexo më tej: Video/ Vlahovic zhbllokohet e vendos ndeshjen: dy gola të anuluar e shumë vuajtje për Juventus ndaj Lecce
KTHIMI I OKTAPODIT
Por një lajm i mirë vjen edhe nga Paul Pogba. Minutë pas minute, francezi shfaqet gjithnjë e më shumë pranë një gjendje të denjë për të shkuarën e tij. Ndaj Lecce mesfushori shfaqi disa nga lojërat që kanë ndezur tifozët disa vite më parë. Do të ishte një lajm i mirë për teknikun Allegri, i cili ka nevojë për fizikun, teknikën dhe personalitetin e Oktapodit, për të përforcuar një mesfushë që nuk është kurrë plotësisht bindëse.
Për të ardhur keq është dëmtimi i Mattia De Sciglio, që do të qëndrojë jashtë për një kohë të gjatë. Mbi të gjitha, Cuadrado do të paguajë çmimin, i thirrur për të punuar jashtë orarit në muajin e ardhshëm. Një muaj në të cilin Juventus do të luajë një pjesë të mirë të sezonit të ardhshëm, nëse vendimet gjyqësore e lejojnë.