Mediat greke kanë zbuluar detaje për goditjen e një rrjeti të shfrytëzimit të vajzave për prostitucion në Athinë. Pjesë e organizatës ka qenë edhe një shqiptar. “Protothema” shkruan se rrjeti drejtohej nga një grua 40-vjeçare nga Uzbekistani, e cila është arrestuar. Është identifikuar si bashkëpunëtor edhe partneri i saj, një shqiptar 35 vjeç. Pjesë e grupit ishte edhe një tjetër grua nga Uzbekistani si dhe një bullgar, i cili transportonte vajzat për në Athinë.
Rrjeti u zbulua pas përpjekjes së njërës prej vajzave të shfrytëzuara për t’u arratisur. Ajo u shpëtua nga banorët e sheshit Vathi të cilët lajmëruan policinë. Policia zbuloi se ishte 40-vjeçarja uzbeke dhe partneri i saj 35-vjeçar shqiptar që “peshkonin” vajza të reja nga Uzbekistani duke u ofruar punë “të arta” në Greqi. Vajzat silleshin në mënyrë ilegale dhe më pas mbaheshin në kushte çnjerëzore.
Tutorët kishin nën kontroll dy shtëpi publike ku edhe i shfrytëzonin vajzat. Vajzat në kushte të vështira jetese kontaktoheshin fillimisht online ku u premtohej punë e ligjshme me 600 euro në ditë. Vajza u tha hetuesve se priste klientë për 12 orë pa pushim, madje edhe në ditët kur kishte menstruacione… Ajo mbante vetëm 10 euro për çdo klient pasi duhet të shlyente borxhin e ardhjes në Greqi.
40-vjeçarja nga Uzbekistani dhe partneri i saj shqiptar thuhet se kishin përfituar më shumë se 37 mijë euro nga shfrytëzimi i saj. Në fillim të qershorit, gruaja i dërgoi fshehurazi nënës së saj në Uzbekistan 1500 euro. Tutorja e kuptoi këtë dhe shkoi në shtëpinë publike për ta ndëshkuar. Aty filloi ta rrihte brutalisht viktimën në sy të dy grave të tjera për ta bërë shembull për të tjerat.
Më pas, e çoi në një banesë ku e kërcënoi me thikë, e goditi me grusht në kokë dhe më pas e rrahu me karrige. Në përpjekje për t’i shpëtuar tërbimit të tutores së pamëshirshme ajo doli në ballkon dhe tentoi të hidhej nga kati i parë. Fqinjët, duke menduar se gruaja fatkeqe po tentonte të vriste veten lajmëruan policinë e cila bastisi banesën. Vajza nga Uzbekistani u dërgua në spital me lëndime të rënda në kokë dhe të nxira në të gjithë trupin e saj. Policia vuri në pranga 40-vjeçaren uzbeke. ©LAPSI.al
Q….i robt edhe atij shqipëtarit sepse edhe ai ka faj. Ose më mirë nxirreni të shesi bythën e vet! Kështu ta kuptojë se ç’do të thotë: shfrytëzim!