“Më vjen të pyes veten se cilat janë rregullat tani. Ndihem i humbur, është si një cirk”. Fjalët janë të Max Verstappen, që në prag të fillimit të sezonit 2024 shprehu gjithë hidhërimin e tij për situatën aktuale të Formula 1. Piloti i Red Bull ishte ylli i madh i sezonit 2023, duke fituar titullin shumë përpara kohe dhe duke i lënë thërrimet kundërshtarëve të tij, duke filluar me shokun e skuadrës Sergio Perez. Mirëpo, kjo duket se nuk e kënaq holandezin, që duke nisur nga Çmimi i Madh i Las Vegas kishte shprehur dyshime të mëdha.
“Është 99% shfaqje dhe 1% ngjarje sportive, dukeshim si kllounë. Nuk është se ndjej emocione të mëdha, do të thotë nuk më pëlqen. Gjithmonë fokusohem në anën e performancës së pistës, nuk më pëlqejnë të gjitha gjërat e tjera përreth”, nënvizoi kampioni portokalli në një intervistë dhënë për Auto Motor und Sport. Ai komentoi gjithashtu propozimin e formatit të ri të kualifikueseve Sprint me vetëm një xhiro në dispozicion: “Tashmë nuk dimë çfarë të bëjmë me formatin aktual, kështu do të bëhej shumë e rrezikshme”.
PAKËNAQËSI PËR GARËN SPRINT
Verstappen nuk e fshehu mendimin as për Garën Sprint, aktualisht aktive vetëm në disa fundjavë garash, por që gradualisht mund të marrë avantazhin ndaj kampionatit. Një situatë që nuk i pëlqen aspak holandezit, i cili nënvizoi se ka një rënie të sharmit të pilotit: “Gjithmonë kam thënë se e kuptoj anën komerciale, por këndvështrimi im është ai i një piloti të pastër- shpjegoi Max –. Për mendimin tim, Sprinti e heq pak magjinë: kur isha fëmijë, ndizja televizorin e mendoja se çfarë do të ndodhte në garë – saktësoi ai -. Të shohësh një Red Bull, një Mercedes dhe një Ferrari në start të bën të pyesësh veten se si do të përfundojë. E në vend të kësaj Sprinti të lejon të dish se çfarë do të ndodhë pak a shumë ditën tjetër, përveç nëse ka rrethana të veçanta, si një ndryshim. në mot. Kjo largon tensionin”.
Lexo më tej: Piloton një Red Bull në F1, por Verstappen nuk mund të ketë një Mercedes GT: “Nuk mund ta blejë”
Propozimi për kualifikueset dhe garën sprint ka gjithashtu një ndikim në rezultatin e kualifikueseve dhe garave më të gjata për shkak të rregullit Parc Fermé të aplikuar pas testeve të së premtes e që ndalon kështu modifikimet në makinë në rast nevoje: “Nëse bën një gabim, qëndron i bllokuar në atë organizim për pjesën tjetër të fundjavës. Është keq. Na ndodhi vitin e kaluar në Brazil. E as fundjavat pozitive të këtij viti nuk më kanë kënaqur plotësisht – sulmoi Verstappen -. Duke menduar për distancën nga toka në Austin, nuk mund të thuhet që Mercedes dhe Ferrari i ulën makinat me qëllim”, konsideron tre herë kampioni i botës, “por sapo të marrësh një rrugë të gabuar, nuk mund të dalësh prej saj”.